Ana. R另類品味 鍾情傷疤男
名模Ana R.及一眾亞洲先生林睿、黃集鋒等昨現身上水，出席亞洲先生競選啟動禮。期間以幼帶小背心上陣的Ana R.更自爆鍾情有疤型男，更透露可能於下年生B！
亞視「ATV2014亞洲先生競選」記者會，昨日於上水舉行，邀得名模Ana. R與一班亞洲先生出席，在遊戲環節中，幾位以「白馬王子」look亮相的亞生，輪流以人力車及接載Ana R.，其中她更由亞生朱曉輝孭着行，讓一眾亞生齊齊大晒「力的表現」！Ana R.亦大讚亞生既sweet又charming！問她對靚仔的睇法？Ana R.自爆鍾意有疤型男：「因為每道疤痕背後都有個故事。我亦鍾意肌肉男，我覺得識打拳的男仔好sexy。」談到於活動中策騎的她會否緊張？她說：「少少，我細個都有騎過，我好鍾意大自然同戶外活動，好開心！」
計劃明年生B
談到其他名模如Lisa S.均相繼生B，她亦爆明年可能生B：「風水師話今年唔係我同老公的幸運年，可能下年生會好啲！（鍾意生囝囝定囡囡？）我冇所謂，但老公應該想要囡囡！」至於同場的亞視高層冼偉智則大爆今次亞洲先生競選會提早舉行，更會設有集體淘汰賽及復活戰，務求令觀眾能收睇更刺激的賽事。
文：影視組