江若琳自稱10年冇收入 林小明：佢啲錢邊度嚟？
江若琳昨日被《好報》驚爆與經理人公司寰宇「反枱」，零預警擲下律師信求解約，令力捧她逾十年的老闆林小明震怒。據知江若琳曾要求公司墊支50萬元，她昨日承認此事，但又自稱「10年來1毫子收入都冇分過」！林小明則反問她平日生活「錢從何來」，並強調：「我哋係上市公司，每條數都好清楚！」
昨日《好報》獨家報道江若琳與合作將踏入11年、一直力捧她的寰宇鬧翻。有傳女方因有內地土豪撐腰，在零商量下向寰宇發出律師信要求解約，令一向力捧她的寰宇老闆林小明既詫異又震怒！據知，江若琳與寰宇簽下15年合約，首10年為死約，之後5年寰宇則有使用權，即是寰宇若想繼續與她合作，女方是不能推辭，除非寰宇放棄此權利才可回復自由身。據悉，江若琳曾要求寰宇墊支酬金，金額達50萬元。
要求墊支50萬
昨日記者致電林小明，他承認公司曾墊支50萬元予江若琳：「係舊年嘅事，總之佢話有需要，咁咪借囉，公司幫助佢冇手軟。」至於合約問題，他說：「呢件事從法律途徑解決。」但他承認希望能和平解決：「件事已經交畀律師，唔可以透露太多。不過我個人係想和平解決，一直都有咁嘅心態。」對於江若琳突然「反枱」，他稱昨日雙方仍未溝通：「呢件事好突然，過年時有見面，完全冇先兆。」
而江若琳昨日透過短訊回覆：「我對呢件事沒有甚麼回應了，只能說我是完成合約，而不是解約，而現在所有事交畀律師處理啦！」對於要求寰宇墊支一事，她再以短訊稱：「我只能夠說，一個賺過千萬，但十年來一毫子收入也沒有分到過的藝人，向公司申請生活費，到底是借支還是酬金，我不知道怎介（界）定了……」
「想佢快啲醒」
對於江若琳自稱10年來分唔到1毫子收入，林小明在電話中說：「如果冇生活費，就一早過唔到生活啦，佢買車、食飯、租屋啲錢邊度嚟？咁講會唔會係因為佢收入唔夠支出多，代表我哋墊支好多畀佢？」他續稱：「佢舊年問公司借時，想佢媽咪安心所以我哋借畀佢，會喺佢嘅工作酬金扣番。每3個月都有Statement（結數單）畀佢簽，佢都清楚而且有簽。我哋係上市公司，每條數都好清楚。」問他是否對江若琳很失望？他仍願給對方機會：「可能佢受人唆擺，年紀又輕，所以作出錯誤決定。佢到2014年5月死約先完結，如果我哋唔捧佢，唔會2011年同佢開個唱，2012年同佢開《高舉．愛》，同年開多套投資5,000萬嘅劇畀佢做女主角，2013年就收成。如果唔捧佢唔會咁樣做，只係想佢快啲醒，盡快好好工作。」
文：專案組