Donald感性騷基仔力撐
電台DJ唐劍康（Donald）的13場個人Talk Show前日圓滿結束，歌手古巨基任尾場嘉賓，並出IQ題考觀眾：「人邊個器官加熱到100度會變長？答案係耳仔，耳熟能『詳』！」全晚出力搞笑的Donald最後感性地分享與太太拍拖的往事：「以前同太太成日鬧交，有次佢中風入咗院，我同個天講，願意用廿年命換佢醒番，之後無論發生咩事我都冇再發過佢脾氣。」
完騷後受訪，Donald表示：「今次係超額完成，我好滿意。」又多謝歌手好友基仔、方力申、鄧麗欣等，更表示好友響應呼籲送米代替花牌，最後共收到600多斤米，並會捐到食物銀行。