張偉文拍管弦樂團坐住開騒

「靚聲王」張偉文自小喜歡唱歌，亦鍾情管弦樂，唱歌以來都想與管弦樂開一次演唱會，奈何成本很高，令他一直未有機會，幸好，終遇上香港流行管弦樂團，成功為他一圓合作夢。將流行歌以管弦樂去演奏，張偉文表示：「要設計唱法夾落去管弦樂入面，始終唔同一般演唱會唱法，管弦樂出嚟音樂感會令人興奮澎湃多啲。」為令觀眾更有新鮮感，張偉文已構思將粵曲「帝女花」配以管弦樂作新的演繹方法。

唱夠1314還歌迷

首次合作可感到壓力大？張偉文坦言：「冇壓力，只有興奮，好似小朋友學緊一種新事物，好大癮，又好似阿媽話買玩具畀你，搞到成晚瞓唔着咁，所以今次要好多謝老闆張國林支持，亦感謝管弦樂團團長欣賞我，唔收我咁貴先合作成功。」兩場個唱不夠喉？張偉文無奈說：「場館冇期可以加啦，開多場自己身體亦應付唔到，如果今次歌迷喜歡嘅話，兩年後咪再搞多次囉，今次叫『1314好友弦』好意頭外，咁我13年冇開，14年還埋13年畀大家。」

熱愛音樂的張偉文坦言只要觀眾唔嫌棄，都會繼續唱。

張偉文（左）感激老闆張國林支持與管弦樂團合作圓夢。

磁力共振搵病源

而近年張偉文被腰患困擾，不能太長時間站立，近年演唱會他都會坐着演唱，而入場聽張偉文的歌迷都相當體諒。提到這老毛病，張偉文指待今次演唱會完成後，便會去照磁力共振，因之前醫生懷疑是糖尿病影響，但近年其糖尿病已控制得到，但雙腳仍然乏力，有可能是腰部的神經被壓着，要靠照磁力共振才能確診，如果結果出來和預測一樣，他便可以做微創手術對正病源。即是有希望痊愈？張偉文則樂觀說：「唔敢望，都咁多年，見步行步啦，坐響度唱歌，只要觀眾唔嫌棄，我都會繼續唱！」張偉文稱現在每次出街都會「士的椅」隨身，有時突然腳軟都可以坐低歇一歇。

文：音樂組