草蜢加場 林嘉欣透視贈興
組合草蜢昨日為６月７至９日假紅館舉行的一連三場「BE THREE GRASSHOPPER IN CONCERT」舉行記者會，同時宣布會加場但未公布日期，大會將記招變成搞笑奧斯卡頒獎禮，請來林嘉欣、張智霖（Chilam）同黃子華做頒獎嘉賓，其中身穿黑色長裙的嘉欣若隱若現透出黑色胸圍及內褲，相當誘人。
而主角草蜢就分別出場，蘇志威率先踩住單車現身，跟住蔡一智就同比堅尼女模一齊上台，阿智笑指因老婆監場而十分尷尬，Chilam就抵死話：「我老婆唔喺度，可以遞交畀我。」當記者要求Chilam挨埋女模身邊影相時，他「笠水」話：「想我死啫！」影完後即九秒九彈開，而林德信（Alex）就陪同蔡一傑進場，Alex更即興表演倒立。
突破求新鮮感
受訪時，阿智話三位頒獎嘉賓到時都會是座上客，當中Chilam更每場訂了三百張飛，他笑指：「懷疑佢拎去炒，大家要密切留意！」他們又指會破天荒準備兩個run down，務求每場都給予新鮮感，至於會否除衫益街坊？傑仔強調會從服裝上玩突破。提到傑仔的好友容祖兒日前鬧爆杜汶澤，傑仔就話未知發生何事，而阿智就笑言：「只要祖兒嚟睇演唱會就會開心晒，阿澤嚟睇就會好平和。」
文：音樂組