千嬅露兩手Seung Ri派吻

韓國人氣組合Big Bang成員Seung Ri昨日飛甩眾隊員來港出席音樂節,吸引半百歌迷接機,戴上黑超配今年勁Hit格仔褲的Seung Ri大打親民牌,主動向左右兩邊歌迷揮手。晚上於音樂節出場時,Seung Ri行落斜台險些仆倒,嚇得歌迷大叫,但他亦識做派吻;而千嬅則打頭陣獻sing。

一年一度的「香港亞洲流行音樂節2014」昨晚假灣仔會展舉行,雲集多國巨星,包括Big Bang成員Seung Ri、日本女星酒井法子、台灣歌手吳克羣、蔡健雅、楊千嬅及巫啟賢等。

半百歌迷接偶像

Big Bang近年不時來港「吸金」,每次抵港例必引起哄動,故Seung Ri昨來港前,警方即架起鐵欄將半百歌迷分開左右企,走在時代尖端的Seung Ri以墨鏡襯頸巾及今年Hit爆的格仔褲,在多名工作人員陪同下步出閘口,並嘟嘴與歌迷揮手,氹得歌迷嘩鬼叫,上車後又雙手緊握拳頭擺Chok Pose。

音樂會舉行前先有酒會,籌委會主席吳雨在台上率領全場人士就「演唱會之父」張耀榮日前離世默哀,他說:「張耀榮先生突然離開非常痛心同惋惜,僅代表業界表敬意。」張耀榮愛女亦現身捧場。而一眾歌手分別出場為音樂會揭開序幕,壓軸現身的Seung Ri行落斜台時險些仆倒,嚇得歌迷即大叫,但他亦識做飛吻冧粉絲。成功踢走10磅的千嬅以黑色吊帶連身裙打頭陣出場,並唱出Hit爆歌《小城大事》。而巫啟賢獻唱《心酸的情歌》時突然失平衡跌到四腳朝天,幸好身手敏捷並執生坐在升降台繼續唱,唱罷抵死地報平安說:「我冇事,係個台有事。」

酒井被爆有新歡

而千嬅受訪時被問到與不同國家歌手同台有否壓力?她說:「每次演出都有壓力,都隔咗好耐冇唱歌。(瘦咗冇睇頭?)係,人生最澎湃就係餵仔嗰時,要再睇就要再生喇,不過依家仲未係時候。」千嬅坦言在後台有與酒井合照,並大讚對方好靚及很Nice,由於Seung Ri戴上黑超,千嬅表示睇唔清楚對方個樣,不過覺得他好有型。

另外,昨有日本消息傳出於2010年離婚的酒井法子搭上64歲演歌歌手山本讓二,有目擊者踢爆兩人於去年秋天在那須高原別墅「蜜」會及拍拖散步。

文:音樂組