千嬅四両缽千斤撼露背JM

一年一度娛圈盛事第十屆「影視娛樂博覽」昨揭開序幕，女星爭妍鬥麗一番，無綫咪神高海寧、性感女星陳靜（DaDa）本令人充滿期待，可是卻不約而同密實封胸。相反JM與惠英紅卻同以露背裝搶鏡，後者更「中門大開」吸睛，至於以「X裝」現身活動的千嬅活動期間竟被發現「缽仔糕」跌落外露的尷尬場面，認真老貓燒鬚。綜觀各女星表現，卻以顏子菲的桃紅色超Deep V最為矚目，「湯碗胸」凸圍而出，隨即成為是日風頭躉。

疑似露「波底」的千嬅聞言反應甚大：「乜嘢（露）半楷呀？橙咩！我用咗膠紙打底o架！（老公唔畀你性感？）點會呀，佢係做品牌o架，佢只會話我行路行得喪；我就嫌佢乜都要快，未食完就嗌埋單，喂，我仲食緊o架！」

千嬅的另一套衫卻令她露出缽仔糕。	陳鈺芸突然起飛腳，成功搶鏡，露打底褲也物有所值。	剛剛生日的陳靜，微露事業線出席電影宣傳活動。

顏子菲搶小花鏡

顏子菲被記者取笑擁「變幻身材」時，她竟幽自己一默謂：「我啱啱去完韓國嘛。今次代表亞視出席國際盛事，扮靚啲都想大家注意到，然後有機會衝出香港，去第二度拍戲。（搶晒無綫小花鏡喎。）佢哋平日性感開嘛，我要長時間warm up，今日都有拉吓筋。」

高海寧與陳凱琳兩位無綫小花，論性感度可謂水準以下。	顏子菲驚現湯碗胸，人氣雖不足，總算將勤補拙。	JM以一襲露背裝現身，回眸一笑，性感迷人。

至於高海寧因收起性感而跌watt，不敵前亞姐，她與陳凱琳齊齊接受訪問時謂：「我哋從來冇輸過喎，我今日嚟sell可愛嘅。」陳凱琳即附和說：「佢真係幾可愛，總之大家都靚啦，只係唔同style，我哋走型格路線。」

輪到陳鈺芸盛裝踏上昨晚的紅地氈，或許明知打女難敵肉女，竟突然high爆大展拳腳，更不理穿着裙子露出打底褲，如此搏命，值得吸引眾人目光。

JM黐膠紙防走光

JM與惠英紅孖住做訪問，談到身上晚裝設計如出一轍，二人笑指彼此心有靈犀。戴上逾150萬Chaumet珠寶的JM直指身上黐滿膠紙防走光，小紅則大方自爆：「我冇打底喎，件衫剪裁咁貼，冇得走光，要走都冇嘢睇啦。（你哋主演套電影3級上映，變咗3級女星喎。）乜話？3級巨星？不嬲都係喎！（3級女星呀！）諗諗吓真係第1次，係林雪啲粗口對白拖累，我都有爆粗，不過得兩個字啫。」

DaDa則是出席《Ｚ風暴》記者會，身穿黑色低胸連身裙的她微露事業線，卻遠不如平日性感，本月22日25歲牛一的她，透露剛從日本度假返港，生日願望是新片票房大賣。

文：影視組