鍾嘉欣空險5小時遺書示愛
馬航事件至今仍未解開疑團，剛從溫哥華返港的鍾嘉欣竟也同樣經歷九霄驚魂，並遇上氣流前後長達5小時。昨日嘉欣現身活動時仍猶有餘悸，透露在航機上除熟讀救生知識外，還寫下「遺書」，向家人及好友表愛意，呼籲大家珍惜生命。
鍾嘉欣昨日出席海洋保育活動，穿上紅色透視短裙的她大晒長腿，並即席獻唱，吸引大批粉絲舉牌支持，她雖然不諳水性，卻喜歡水底世界，試過兩次潛水，故有意學習游泳以備不時之需，不過由於緋聞男友伍允龍亦不懂游泳，所以也未能指導她。
重提仍有餘悸
早上才從溫哥華探親返港的她，透露於當地逗留3星期，順道調理身體，她謂：「我要做成功女人，所以一定要平衡生活，工作同家庭都配合得好好。（未結婚點成功？）相信會做嘅。（有計劃？）唔知呀！（求咗好多次婚？）冇。」為免傳媒追問其感情事，嘉欣即轉話題，自爆於機上遇氣流達5小時。
談起事件始末，嘉欣仍然驚慌非常，透露過程間還寫下「遺書」，她謂：「啲杯爛咗，水又倒瀉晒喺地上，真係好驚，所以就寫咗張紙，Mum、Dad、家姐、阿哥同朋友，我愛你們，希望大家可以珍惜生命，唔好為小事煩惱，我仲將救生卡入面嘅內容背晒，有咩事都識得點做。」雖然如此，但嘉欣表示下月仍會為工作四圍飛：「氣流嘅嘢唔驚得咁多，返嚟之後第一件事係想瞓覺，因為真係好攰！（今次學到好多嘢？）冇錯，以為見唔到大家添！」
陳展鵬送安慰
曾與鍾嘉欣傳緋聞的陳展鵬，對嘉欣空中歷險一事表示關心，他安慰對方說：「冇問題嘅，嘉欣依家行緊運，唔會有事。」他承認自馬航客機失蹤後，對搭飛機也有點陰影，不過祈禱就可以讓他安心。另有指他撻着唐詩詠，展鵬對此笑說：「都好嘅，唔使成日同嘉欣傳緋聞。」雖然他否認與詩詠的戀情，但就大讚對方是個好女仔。而嘉欣好友王君馨亦表示嘉欣有對她訴說此事，她本人亦遇過強烈氣流：「好似坐過山車咁，我仲寫埋情書畀男友添，依家封信仲喺度，結婚先畀佢睇。」
文：影視組