呂慧儀佗「蟹子」箍老公

現年31歲的呂慧儀於2011年與拍拖多年的男友Dickson結婚，婚後一直開口埋口恨生BB，期間屢傳有喜但始終「中空寶」，眼見2006年同屆的港姐冠軍陳茵媺及亞軍周家蔚先後榮升人母，令長腳蟹更是羨慕。去年底Dickson在微博上載一對男女拖手相，旋即爆出「小三」疑雲並激嬲長腳蟹，最終兩人雖然和好如初，但為防老公再有機會出軌，長腳蟹即「加大力度」來一招「生BB箍老公」，近月加多兩錢肉緊努力造人，至昨日終傳出喜訊！

飯敍滴酒不沾

昨日Dickson在微博上載了兩隻愛貓相片，並加上設計對白：「肥獅：『大佬，我都就嚟做大佬喇！』飛虎：『邊個講你知？』肥獅：『我偷聽到老竇講，唔會假啩？』飛虎：『叫你用吓腦啦肥仔，係多個主人啊！』」話有玄機，暗示家中將添新成員。阿蟹還留言說：「攬（搞）咩你兩隻嘢作反啊？偷聽老竇講嘢~。」不過，前日阿蟹已在微博留言：「有些話總是在想說不能說的糾結中……」未知是否心急想將喜訊公告天下，令心中糾結呢？

腰肢變粗、上圍升級的呂慧儀穿厚褸、拿披肩「護胎」，老公黃文迪緊張伺候。

阿蟹呂慧儀終於「得咗」佗B，黃文迪錫晒佢啦！他更在微博疑似公開家有「新主人」的喜訊。

其實大前日長腳蟹相約友人飯敍時已暗藏有喜迹象，當晚約十時，她在中環與友人聚會，心情靚爆的她不停笑晒口，但向來千杯不醉的她全晚竟滴酒不沾，逗留約個多小時後，Dickson前往迎接愛妻，長腳蟹步出餐廳時即穿上厚厚大褸及拿着披肩，深怕凍親腹中塊肉，愛美的她又改穿平底鞋，上車時更是分外小心。向來身材索爆的阿蟹，此時雖然包到冚，仍可看出明顯腰梗梗，上圍更因有喜而升級。

黃文迪緊張傍實阿蟹。

着平底鞋的呂慧儀小心翼翼上車。

「生女可扮靚」

昨日長腳蟹接受電話訪問，記者恭喜她有喜，心情大靚的她哈哈笑說：「多謝關心，有開心事就會公布。（幾時？）快o架喇！4月就可以，老公都讚我身材好咗。」問到是否未夠三個月怕小器？她笑住未有否認，並指由結婚開始已很期待有BB，而近日節目已拍攝完畢，可暫時休息，有空會做運動、按摩及睇中醫保健，老公亦已戒煙配合。問阿蟹想生仔還是生女？她說：「女啦！可以同佢扮靚，仔都冇所謂。」

2006年港姐周家蔚（左起）、陳茵媺先後做媽咪，呂慧儀如今才有好消息。

呂慧儀（左）與友飯敍，飲得的她是夜滴酒不沾。

文：影視組

攝影：追蹤組