鄭家星怕醜唔敢撩周秀娜

於《西遊記之大鬧天宮》中飾演哪吒一角的鄭家星,原本一心想做歌手,但拍完《葉問》後便愛上電影,不惜找老師學習演戲,跟周秀娜更是「同學仔」!自認怕醜仔的家星,大讚女神靚女,不過當時唔敢跟對方交流,非常可惜!

創作歌手鄭家星於內地賣座電影《西遊記之大鬧天宮》中飾演哪吒,雖然戲份不算多,但都落足心機做,每個眼神與表情,都捕捉到哪吒的神韻,表現不俗。

演而優則唱

家星不諱言表示,在接拍該片前,花了不少時間去揣摩角色,他謂:「我摷咗好多哪吒嘅資料,花咗一段時間去諗點樣去演,再加上導演鄭保瑞喺現場教咗我好多嘢,令我演上嚟更加得心應手。」

由細到大,家星都很喜歡音樂,初入行時原本打算只向音樂方面發展,但後來得到電影人黃百鳴給予機會,遂接拍了電影《葉問》後,自此就令他愛上電影。

溶妝依然靚

拍畢《葉問》後,即找著名舞台劇演員彭秀慧教演戲,希望令演技有所提升,而當時周秀娜亦是彭老師的學生,家星表示:「當時大家都係啱啱出道,都係新人,我又好怕醜,比較少交流。(覺得周秀娜靚唔靚?)佢好識化妝,有一日佢入嚟上堂,可能當時天氣太熱,雖然佢個妝有啲溶咗,但依然好靚女!」

文:影視組