周柏豪處理潮政不求人

周柏豪是圈中公認的潮人,對着衫甚有見解的他毫不吝嗇分享衣着貼士,除了做足功課外,更要對自己衣着打扮有信心。去年柏豪更榮升老闆,設立自家品牌,落手落腳處理「潮政」,絕不假手於人。

歌手周柏豪曾經做過模特兒,對衣着打扮有自己獨特一套心得,更是圈內其中一個潮流Icon。為adidas Originals擔任代言的柏豪談到被捧為潮人,他直言一分耕耘一分收穫:「其實我呢個名背後都要花好多功夫,上網睇好多嘢,留意好多嘢,做好多資料搜集,睇吓近排興乜嘢,例如今年興80年代啲乜,90年代嘅時候又興啲咩呢,全部都要做資料搜集,吸收多啲先知咩適合自己着。」問到他有何着衫心得分享?柏豪說:「都係要啱自己,着啲唔啱自己嘅就無謂夾硬,其實買自己鍾意嘅衫,着得自己舒服,着得自己有信心,咁樣就會靚囉!」

興趣化為事業

去年柏豪投資七位數成為星級老闆,成立網上潮店售賣自家品牌,將自己興趣化為事業。近年不少藝人包括古巨基、徐濠縈均擁有自家品牌,問到柏豪是否要和眾星打對台?他說:「完全冇諗過要打對台,因為大家行緊唔同路線,客源都唔同。依家係做好網上平台先,我嘅客源同埋我嘅風格都係啱網上店,舖頭會開,但唔係短期內嘅事,做好啲網上平台先有進一步嘅發展。」

冇向女友取經

提到有網民曾批評他品牌的服裝設計求其,柏豪謂各花入各眼:「設計嘅嘢,冇一個標準,底衫八百蚊都有啲人會買,冇設計添,睇吓你需要買個牌子、品質,每個人都有佢嘅抉擇,So far買我衫嘅人都幾滿意。」問到柏豪會否向他任職時裝界的女友取經?他說:「唔關事,個牌子係我嘅,所有嘅事都係我o架喇。」

文:音樂組

服裝:adidas Originals