祥吐真言 阿田參透人生只係賺經歷

田蕊妮入行日子不淺,不過面對演戲及人生均經驗豐富的黎耀祥,視后也不敵視帝,甘拜下風!阿田於祥仔身上學會參透人生,兩人之間話題充滿哲理,大談人生如戲,但演戲卻又假亦真時真亦假,當眾人皆醉我獨醒時卻實悲哀,認為演員並非開心工作,人生行到盡頭即使何其精彩,最終能夠帶走的也只是經歷,可謂無限唏噓!

田蕊妮:田 黎耀祥:黎

田:21歲拍亞視劇《電視風雲》時識你,嗰時好細個,角色唔係好多戲,但我幾驚你,你係我偶像,知道同你拍戲好緊張,你知啦,當時有人讚話覺得我做戲叻,當要對住好戲之人就好驚,會唔會發現我嘅破綻。

黎:我對你有印象係拍《蘇東坡》,覺得你細路女,當時好多群戲,你做郡主,本身性格好直,易睇到,畀人鬧兩句就眼濕濕,我冇特別開解你,只係將氣氛搞relax啲,依家你都係直接,喺呢行屬於好直,咩都講得,唔係好怕醜,係冇咩顧忌,到早前拍《造王者》時你咩都問,咁多個女對手最多問題係你。

田:多數問你演戲點處理,有機會坐低就問,好似詢問處。

黎:我都冇避你, 你問實在嘅嘢,呢個世界有咩我答唔到,都吹得o架!

田:平時唔會好意思打電話問你,見你答人好瀟灑,其實唔夠瞓。

黎:有時攰唔想人煩,有時有point,傻有傻答,演員要控制情緒,唔好影響拍戲,人生只係賺經歷,可以帶走都係呢樣嘢,完全冇脾氣又唔係,梗會有多少,老婆會開解,演員習慣唔開心,好明白,人生亦唔係開心事。

田:以前會覺得係唔開心,喺機器前又喊又笑點會開心,依家覺得演員係有福分工作,透過角色認識自己,清楚入面情緒係點,對人生係賺經驗,最後就似發夢一樣,唔會當所有嘢係真實,做戲係真實定唔真?人生似做戲,做戲似唔真,只係同嗰個人感情、感覺係真實,但其實又唔真實。

黎:真同假係複雜問題,演員基本唔開心,牽涉層面太深入,對人生真同假要有一個觀點同價值,好多時真假好模糊,以為係真,其實係假,當件事係假點面對,價值觀大問題,淨係真假已有排諗,人生係一個夢,但個夢唔真實仲要爭取咩,好深嘅哲學問題,係假又做嚟有咩意義?

難抽離角色 視帝也無奈

田:人生係冇意義,唔係所有人都知係假同冇意義,咁就大家enjoy啦!

黎:眾人皆醉我獨醒咪仲悲哀,悲觀下產生樂觀,消極入面產生積極,明白咗會覺得自己好無聊,呢個問題係兜圈諗唔通,人生都要入世,唔可以用理論參透人生,理論上面,實際下面,我都試過喺角色好耐先出嚟,所以認真大鑊,上天畀相當酬勞你,演員付出感情係必然,當你明白時係幾無奈。

田:既然係咁你仲可以keep住啖火演戲?

黎:唔知點解,我慢慢唔鍾意演戲,但必須要演,因為係我生命。

田:攞咁多視帝有冇壓力?

黎:成功對我嚟講唔重要,有人讚唔代表你識做戲,人生冇盡頭,你問我係咪好叻?我仲有好多嘢未做到,自己搞掂又有其他嘢,點會完,愈行出去愈覺得自己不足。

田:驚唔驚返轉頭都係嗰點?

黎:唔驚,根本係咁,人生行到最後都會返轉頭。

後記:遇上對手

年前曾經與田蕊妮做過一個深情訪問,當中阿田的對話相當玄妙,亦包含一些佛偈,令筆者印象深刻,沒想到今次阿田遇上對手——黎耀祥,祥仔那種參透人生的睇法,令筆者與阿田也要停一停,想一想箇中道理,基於話題認真,阿田也把平日講唔停的性格放下,洗耳恭聽這位經驗豐富的前輩「教書」,事後阿田笑謂:「同祥仔傾偈真係得着太多,我諗除咗老公會同我傾呢啲話題之外,就只有佢會睬我!」