Eason興奮錫手 小鳳勸拉褲鏈

徐小鳳於紅館舉辦的《小鳳姐走過順逆流,依然金光燦爛徐小鳳2014演唱會》前晚開第六場,請來陳奕迅(Eason)做嘉賓,於下午綵排時,Eason穿上剪裁特別的褲,令小鳳姐誤以為他未拉褲鏈,問他:「你係咪唔記得拉褲鏈?」嚇得Eason馬上解釋:「我條褲係咁o架,你見唔到條拉鏈咋,有拉o架!」

開心台上彈跳

到晚上演出時,小鳳姐整蠱Eason說:「你件衫好靚,有冇拉拉鏈?」Eason大笑說:「有!我好尊重o架,着到成個探長上來見你!」小鳳姐即說:「係喎,成個曹達華咁!」

Eason半跪親吻小鳳姐的手背後,開心到不停彈跳,着住散裙的小鳳姐又跟住他一齊彈,彈了多下後笑言:「哎吔!我再跳會甩晒啲嘢o架喇!」引得全場爆笑。

睇騷感動想喊

Eason又笑言上台前被監製叮囑不要「吹神」上身,怕會被加時罰錢,不過他亦不忘賣口乖大讚小鳳姐演出精彩:「真係好好睇!一路聽你啲歌我好感動,差啲喊出嚟,你真係好值得後輩學習,我會幫你宣傳,叫大家歌手一定要睇你演唱會,睇吓人哋係點做騷!」

反應甚快的小鳳姐即說:「我係唔使宣傳,我已經好出名o架喇!」此話一出即令Eason笑到停唔到,不停拍掌,對前輩的幽默感佩服得五體投地。

文:音樂組