Iron Kwok 帶「森姆積遜」揾食
音樂人郭偉亮（Eric Kwok）在廣告中大玩cosplay，本身已是「港版」羅拔唐尼的他刻意留鬚兩星期，穿西裝變身「Iron Kwok」，造型幾可亂真！更令人驚喜的是他所推薦的黑人亦激似森姆積遜，驟眼睇以為邀得荷里活巨星來港拍攝。
近年成為音樂製作人搶手貨的Eric Kwok，一直被指激似荷里活巨星羅拔唐尼扮演的超級英雄「Iron Man」。日前Eric化身「Iron Kwok」，拍攝太興飲食集團最新一輯廣告。首次拍廣告的他大呼過癮，即使連續拍了十多小時都冇嗌辛苦。他說：「好好玩，好玩過作曲編曲添！拍出嚟好靚，好似真係嗰套戲咁，仲搵埋戲入面同款嗰部車畀我揸，幾大製作、幾勁！」
黑人朋友必爆紅
原本Eric外貌與羅拔唐尼已有幾分相似，為了更逼真，他更兩星期沒剃鬚：「呢執鬚留咗兩個禮拜喇，要剪要修，化妝搞得最耐都係呢執鬚。」本以為他chok樣已幾可亂真，豈料一山還有一山高，他找來的黑人朋友與「Iron Man」好友、由森姆積遜飾演的「神盾局局長」幾乎一模一樣。Eric說：「佢係我彈bass嘅朋友，因為我知道有呢個黑人角色，有一日無啦啦醒起佢個樣，都幾似嗰個人吖，咪提議搵埋佢做。」
Eric笑指黑人朋友必定憑廣告爆紅：「其實我得四句對白，黑人先生仲多過我，佢要講廣東話添！佢老婆係菲律賓籍，但喺香港長大，啲廣東話仲叻過我。呢幾日不斷同佢操，所以佢講得好正，冇乜懶音，係啲音調有啲怪，『搵你嚟』太興讀咗『溫匿李』太興。」
文：音樂組