寶珠阿嗲戲台情狂

陳：陳寶珠　

梅：梅雪詩

寶珠、阿嗲演活裴禹與李慧娘，令戲迷睇到如癡如醉。

寶珠（右）阿嗲（左）錫晒仙姐。

記：記者

阿嗲、寶珠台上台下都是對好拍檔。	仙姐到場為寶珠（右）及阿嗲（左）打氣。	梅雪詩說永遠記住恩師的教導。

暗擁香肩輕貼腮

記：任白喺戲台上演才子佳人，愛得癡纏，令戲迷睇到如癡如醉，你哋點樣演繹呢種愛？

陳：排戲嗰陣，我同阿嗲講：「你愛我多啲啦！」仙姐（白雪仙）都話：「暗擁香肩輕貼腮」，你要面貼面我多啲，但阿嗲好怕醜！後尾至喺眼神上同我有交流，畀我感覺到你真係愛我，我哋要做多啲，舞台上至有火花出現。

梅：嘻嘻，寶珠我已經夠愛你！我一上台就會好投入。其實唐滌生（已故編劇家）筆下嘅才子佳人，比現代人愛得更情狂，《帝女花》一見鍾情、《再世紅梅記》人鬼殊途，其實只要兩個人享受、互相關心，我覺得冇所謂。相比時下嗰啲年齡差距、姊弟戀，根本唔係問題！

姊弟戀隨緣

記：時下有唔少姊弟戀，如果有後生廿多卅年嘅男士追求，會唔會接受？

陳：人哋我就覺得冇所謂，但要我同個後生卅年、廿年、十年嘅男士一齊，就點都唔係咁好，如果早幾十年，我可能會去試，但依家我呢個歲數，搵個卅歲？唔好啦！兩個人行出嚟，我接受唔到囉。

梅：我就冇所謂，只會話隨緣。緣分係唔知道o架！我又未婚、未有家庭，所以會答「隨緣」囉！正如仙姐教戲話齋，感情係教唔到，唔可以夾硬質畀你，要自己慢慢領悟。

嚴師仙姐敬又畏

記：仙姐一直追求完美，面對呢位大藝術家，會唔會好大壓力？

陳：上次仙姐畀我哋（文化中心演出）60分，嚟緊演藝學院演出第二part《再世紅梅記》，邊敢奢望攞90分？保持到唔攞少過60分，已經好開心！我對仙姐真係又敬又畏，心情好似返學攞成績表咁！

梅：我上次有一場換唔切衫，搞到有少少蝦碌，好在觀眾包容，後尾問題改善咗。嚟緊我都係覺得保持到60分已經好開心！唔好講演出，我諗起排戲都已經緊張，好驚發台瘟。

陳：我都唔敢放鬆，緊張到腳震手凍，每晚我要演到第四場後，至敢放鬆少少，因為前四場好多唱做，我怕太放鬆會影響表現。

難與阿刨比

記：寶珠姐，外間會將你同阿刨（龍劍笙）比較，你點睇呢？

陳：我拍電影多，舞台經驗淺，阿刨就深啲，但我覺得冇得比較，大家同為師傅門下，演繹方式都係朝任姐（任劍輝）方向去做，出嚟效果一定唔會相同，各有各味道囉，壓力係有，但只係緊張記曲詞，其他嘢唔理住囉！

梅：同邊個做拍檔都好，我都係咁做。後日（18日）開始發售三月二十七日在演藝學院的第二part公演戲票，希望大家多多支持。

陳：最好一開賣就爆滿，咁我就好開心！

後記：心又喜 心又慌

訪問寶珠姐與阿嗲兩位前輩，小記體會到何謂「我個心又喜，我個心又慌」。喜者，是「得聞好姊妹談論」演出期間鮮為人知的點滴；慌者，生怕因準備不足在前輩面前失禮自己、失禮報社。

然而，寶珠姐、阿嗲屹立藝壇逾半世紀，無論小記準備工夫做得如何，所謂「台上一分鐘，台下十年功」，終究也難望兩人之項背，猶幸兩位前輩包容，更紆尊降貴，反過來親切囑咐：「幫幫手，邊啲講得唔好嘅，幫我哋修飾吓」，小記定當如《再世紅梅記》中一段滾花所言：「晚生能代長者勞，待我殷勤將力獻」。

文：影視組　

攝影：沈健程