發哥挑基自薦咀霆鋒

周潤發、謝霆鋒及導演王晶昨晚出席新片《賭城風雲》慶祝活動,霆鋒稱再想與發哥合作,望對方重現Mark哥風采,發哥則繼續放笑彈,笑言不介意孖霆鋒玩斷背,還讚對方好咀!

影帝周潤發與「發嫂」陳薈蓮、謝霆鋒、導演王晶、張晉及伍允龍等昨晚出席電影《賭城風雲》團拜,宣布截至前日電影在港票房逾3000萬港元,內地則大收約3億3000萬港元。

親解金毛look之謎

對於成績甚佳,霆鋒表示期待再與發哥合作,尤其想他拿槍再演Mark哥,霆鋒說:「我做咩都冇所謂,想認真啲,今次係認真搞笑。」問到早前是否到新加坡探兩子,他只答「去咗好多地方」,並指不想談及家事。問到新金毛look有否嚇親兒子?他拒絕回答,指新形象是為了飲食節目做準備,並透露將拍攝3個月,本月14日出發往澳洲,提到當日是情人節,他詐傻說:「係喎!都要做嘢啦!有拖拍會話你哋聽。(依家有冇?)冇!」

發哥則對票房大感滿意,提到主演的兩套賀歲片已收逾10億港元,他笑說:「都唔關我事,唔到我袋,都係嗰條友(指太太)拎。」對於霆鋒提議他再拎槍,發哥笑說:「我成日叫佢諗劇本,佢死唔諗咋嘛!(想拍槍戰?)佢都同周杰倫拍過《逆戰》,可以搵番佢,不過AK47對我嚟講太重,掌心雷OK!(仲想拍咩題材?)唔使講對白,做啞,未做過呀!」問到會否返TVB拍劇?他表示若每日有8至9小時休息,加上角色適合都可考慮。

讚兩「葉問」高手過招

發哥又指今屆金像獎影帝提名競爭激烈,並提起梁朝偉及黃秋生:「葉問對葉問,兩個都好高!冇咗個台灣影帝(李康生)好啲,張晉就提名男配角,佢嚟咗香港咁耐,有部戲大展身手都期待佢有獎。」其後發哥搞笑唱歌完結訪問:「恭喜恭喜恭喜你!我好肚餓呀!」

發哥、霆鋒及王晶在台上傾偈,霆鋒自爆現時147磅,令逾150磅的發哥笑言要再減肥,更擺出打拳甫士,場面搞笑。王晶提議下部戲兩人可拍《斷背山》,發哥即笑說:「咁chok嘅男仔我都鍾意,而且佢(霆鋒)好咀呀!」

文:影視組