Heidi遭冒名呃羅力威電話

五人女子組合Super Girls成員李靜儀近日被一女子多次冒認，向藝人索取其他明星的電話號碼，有見及此，Heidi前日即在Instagram上載一張卡通人物扁嘴的相，並寫道：「如果我要各位藝人的電話，我會親自問你拎，唔會假手於人，請小心冒充者。」Heidi的隊友Cheronna即在Instagram公開冒認者的電話號碼作回應。

籲各藝人留意

Heidi昨接受電話訪問指，事件已不是首次發生：「羅力威日前問我係咪搵佢，話有個叫Heidi嘅人打畀亢帥克要佢電話，其實我同羅力威都有大家電話，咁先奇怪。」Heidi續說Cheronna於同一時間向她求證：「Cheronna打嚟問我係咪四圍問人攞藝人嘅電話，我話冇，佢話Robynn（組合Robynn & Kendy成員）同佢講我周圍打畀人，所以我覺得事態嚴重，即刻喺網誌叫大家小心。」

Super Girls昨日出席活動時沒有異樣。

有人冒充Heidi向亢帥克（左）索取羅力威（右）的電話號碼。（資料圖片）

藉口介紹工作

問Heidi會否報警？她說：「擔心係犯罪集團所為，有考慮報警。」Heidi又憶述三個月前有人借「有好工介紹」為名，向一模特兒索取其電話號碼：「諗起成件事好怪。（有冇畀人玩電話？）個模特兒朋友好好，冇透露我電話，仲通知咗我。」而記者昨致電冒充者，但至截稿前仍沒人接聽。

文：音樂組