陳嘉桓攬磚頭唔要男人
陳嘉桓（Rose）及陳智燊（Jason）無懼樓價高企，兩人表示希望新一年可以上車做業主。Rose揚言為買樓，寧願要錢唔要男人。而愛車一族的Jason，則為買樓要放棄換車計劃，兩人認真大犧牲！
面對樓價高企，每個香港人都有個置業夢，Rose及Jason都不例外，兩人異口同聲希望新一年可以買樓做業主。單身的Rose笑言要集中火力搵銀，寧願要錢不要男人，她說：「今年希望可以買樓，希望可以發個『新年財』放喺買樓基金度。雖然同買樓都有一段距離，所以要努力啲做嘢。（有冇心水？）我本身有養狗，除咗要買養到狗嘅屋外，亦要畀佢哋足夠活動空間。」而Rose又笑言錢重要過男人，所以今年不會考慮兒女私情︰「為咗要買樓，搵錢重要啲，所以感情事唔諗，自己唔急，屋企人又冇催。」
睇中西環樓
至於憑乖乖仔形象深得客戶歡心的Jason，去年密密拍廣告賺到笑，透露睇準時機買樓做業主，連換車計劃都要擱置，他說：「聽朋友講今年樓價會跌，所以睇定啲，準備上車。目標想買間細細地，用嚟自住或投資。其實我本身想換車，但為咗買樓我都要忍手啦！」而Jason又坦言買樓地區首選是西環，他說：「西環就嚟有港鐵，個街坊感覺好正，又有好多地道舖頭。」
場地︰Shelter Italian Bar & Restaurant
場地︰Mikiki
文：專案組