子珊夏薇手口制林峯
沉醉戀愛中的林峯近期甚少公開露面，趁馬年來臨，call齊家族成員徐子珊、林夏薇與黃智雯齊齊吃開年飯，期間子珊與夏薇竟掉轉槍頭，一個咬、一個箍制服阿峯，連大佬都冇情講，惹笑非常！
以林峯為首的「Chok氏家族」去年各有各忙，趁新正頭樂得清閒，阿峯即叫齊「細妹」徐子珊、林夏薇與黃智雯食開年飯。期間，大家眼見桌上一對「金魚年糕」，阿峯即拿起作釣魚狀，子珊與夏薇亦相當配合齊齊擘大口。之後三女筷來筷往，搶夾餸菜，原本阿峯欲退後讓位，怎料三女竟互打眼色，未幾即齊齊夾攻他，子珊及夏薇更又箍又咬，令林峯動彈不得。玩樂一輪過後，夏薇也親手餵阿峯吃年糕補數。
黃智雯尋突破
談到馬年展望，阿峯透露會與舊拍檔佘詩曼拍新劇，問到會否怕陳年緋聞再被炒起？他笑謂：「唔會啦！正如阿佘話好了解大家，可以專心投入角色。（唔怕女友投訴？）我係專業演員嚟嘅！（新年會唔會去拜年？）會做應該做嘅嘢，知大家好關心我感情事，但希望畀番啲私人空間啦！」
新年後開劇的子珊則謂：「舊年都幾豐盛，希望今年都可以咁幸運啦！之前放咗個小假期探屋企人兼叉電，依家準備重新出發。」至於夏薇與智雯亦望於角色上尋求突破，正有新劇出街的夏薇，對其獻唱的主題曲網上點擊率不俗感興奮，笑言對日後唱歌打了支強心針。
文：影視組 攝影：劉智源