DaDa情陷金宇彬桃花催緣
四大性感女神踏入馬年各有願望，陳靜（DaDa）入行3年首嘗派利是，化身「旺財女神」豪派6位數，據知有意打入韓國市場的DaDa，本月中有機會親見韓國男神金宇彬，並向公司自薦求合照！至於名模Jessica C.則打算敲響一對「警鐘胸」，目標勁賺8位數，不諱言「全裸有得諗」；做老闆的Mandy Lieu亦帶「鬼」出巡，望新年財源滾滾來，莊思敏則撈過界，望利是收到「億億聲」！
陳靜（DaDa）狀態大勇，拍戲拍到無停手，早前跟杜汶澤到橫店拍戲，新年後又與古天樂合作，即被指勁賺500萬過肥年！今日大年初二，DaDa谷胸上陣舞獅拜年，祝願大家身體健康，人人賺多啲！雖然DaDa早已是圈中小富婆，但原來她入行後未嘗派利是：「我唔係特登唔派o架，係咁啱見唔到大家，今年會大派特派喇！（預派幾錢？）都有6位數，總之見人就派，大家記得同我拜年，不過我都會向杜汶澤佢哋逗番夠本，哈哈！」
積極備戰學韓文
DaDa又自爆早前狂煲韓劇《繼承者們》，型男金宇彬更成為她的男神。據知其經理人公司已安排金宇彬本月中來港，「情陷」oppa（哥哥）的DaDa即毛遂自薦，要求見面兼合照，她說：「佢16號嚟香港，我勁開心呀！可惜到時我要拍戲，但我已經第一時間同公司講，一有空檔就會去見佢，影張相都好！」而有意打入韓國市場的DaDa，更表示正積極備戰學習韓文。
「識到韓男梗係好」
單身多時的DaDa又稱家中已擺放大桃花，望為新一年催旺人緣，她說：「呢行最緊要有人緣，所以一早已經買咗好靚嘅桃花放喺屋企。（會否趁機在韓國識型男結姻緣？）韓國咁多型男，識到梗係好，不過我咁忙都未必有時間。（你係上海人，有咩傳統習俗？）往年我都會同媽咪返上海過年，會一大班親友食飯，我最鍾意食八寶飯，仲會親手幫婆婆一齊整。」