發哥捐億萬身家：啲錢唔係我嘅！

紅足近四十年的影帝周潤發坐擁逾10億身家，依然毫無架子保持節儉生活，難怪被廣大市民封為偶像。發哥日前在北京接受《東網》專訪分享金錢觀，提到早前他打算身後捐出所有身家，發哥大方開腔回答，認為錢財身外物，計劃「裸捐」幫助貧苦大眾。他說：「我覺得啲錢都唔係我嘅，我暫時保管住一陣之嘛！捐啦，捐晒佢！到時睇吓邊度有需要咪捐去邊囉！到最後一刻作決定，就視乎當時社會嘅需要。」發哥在賀歲片《賭城風雲》中飾「新賭神」石一堅，同樣將贏出的錢捐出行善，果然戲裏戲外都充滿善心。

拒請司機唔想煩

神級影帝愛落區跟街坊吹水，依然坐巴士、港鐵，甚至到街市買餸，他搞笑地說：「啲人問我點解仲會搭地鐵，我話有咩所謂？地鐵有百分之九十嘅人耷低個頭（玩手機），根本都抬唔起頭嚟望我，鬼知我入咗車廂咩！如入無人之境啦！」

發哥在戲內演盡皇帝、英雄及富豪，他直言「華衣美服」、「珍饈百味」都歎過，反而最享受簡僕生活，沒有名車沒有司機更是樂得自在。他謂：「呢種生活方式適合我，我有架車泊咗喺度，要行到冇雷公咁遠拎番架車，嘥我時間呀！我請個司機，佢要成日等我，我心又唔舒服，我牽掛有個人喺度等緊我，呢種係煩！我自由自在，坐地鐵、的士去到邊度咪周圍行呀、影相呀，買嘢食又好，睇風景又好，街上有好多人生百態o架嘛！有時尖沙咀行到太子，再行返屋企都得o架！」

智能電話冇需要

問發哥如何善用金錢？他認為節儉可改變命運，建議大家養成儲蓄習慣。孝順的他憶述母親教誨：「我阿媽有句話係啱嘅，將你份人工儲起10%，依家賺一萬蚊係好易，看更都八、九千，但儲一萬蚊係好難，生活開支大吖嘛！」發哥自言不追求潮流，認為心靈富足比物質充裕重要，更自爆手機仍是多年前的型號，沒有智能電話。他說：「係咪呢個世界人有我有，人要我又要？要諗清楚，有冇咁嘅需要呀？我冇智能手機，係我唔需要。我用個電話打出去，話畀人知我返緊嚟食飯喇喎！收線！依家係娛樂太多，不停令人使錢，冇令人覺得儲錢係好習慣。好似阿sir（邵逸夫）百年歸老，追思會叫你哋唔好做乜整乜，嚟鞠個躬就得，呢啲就好囉！唔係叫你孤寒，但節儉係一種美德。」

發哥金句

地鐵有百分之九十嘅人耷低個頭，鬼知我入咗車廂咩！

我有架車泊咗喺度，要行到冇雷公咁遠拎番架車，嘥我時間呀！

我阿媽有句話係啱嘅，將你份人工儲起10%！

我冇智能手機，係我唔需要！