陳茵媺餵人奶冇覺好瞓
今年的農曆新年對身為人妻兼人母的陳茵媺（Aimee）可謂有雙重意義，計劃坐月百日的Aimee日前「放監」一天接受專訪，以人奶餵哺兒子的Aimee笑言兒子十分大食，一個月已經重了五磅，有子萬事足的她又有Perfect Man老公陳豪，而夫妻為了湊仔更冇覺好瞓。
形容老公陳豪是Perfect Man的陳茵媺，剛於一個月前誕下兒子Aiden Joshua，她至今仍難忘兒子出世一刻，她說：「最難忘佢啱啱出嚟、啱啱開晒眼嗰一刻，佢好精靈，自己就覺得好奇怪，佢咁大個點可以喺我肚裏面，冇可能喎。」
再生睇個天
以人奶餵仔的Aimee透露兒子十分大食，一個月已重了五磅，二個半小時就要吃一次奶，胃口好好，她說：「佢依家個幾月，同佢傾偈開始識反應、會笑，佢好聰明、學嘢好快。」Aimee謂湊BB的每個過程也覺得有難度，最有滿足感是第一次氹兒子瞓覺，她說：「佢好醒瞓，最難係氹佢瞓覺，最初唔知邊個位佢先瞓得舒服，足足用咗四十五分鐘先氹到佢瞓，嗰一刻好開心，同埋覺得媽味唔易做。」問到Aimee會否在馬年追多個？她說：「睇個天幾時再送第二個畀我，自己都想做嘢先。」
湊仔夠淡定
Aimee覺得她與陳豪成為父母後沒有大轉變，只是感到多了份責任感，她笑說：「係大家都冇覺好瞓，最初以為大家都會好緊張，但又唔係喎，佢湊仔嗰陣好淡定。」而Aimee主演的劇集《單戀雙城》最近出街亦勾起她的戲癮，她說：「自己演戲團火仲未熄，但係要睇身體情況同BB，先知幾時可以復出。」Aimee指《單戀》內的角色也似她的愛情寫照，她說：「有時你會以為遇到Perfect Man，但真命天子後來先出現，假如幾年前問我有冇可能同陳豪結婚生仔，自己都唔會知，依家佢就係我嘅Perfect Man，人生就係咁意想不到。」
採訪：影視組