甄子丹升呢老闆發哥靠晒佢
周潤發與甄子丹連日來「高手過招」谷戲，二人昨晚出席《西遊記之大鬧天宮》首映禮時，發哥當眾稱子丹是「甄老闆」兼「男一號」，子丹則笑指經常遭發哥「投訴」，發哥笑說：「佢唔敢喺我面前話我打得唔好，想死咩！」精彩對答，果然薑愈老愈辣！
神級影帝周潤發、「宇宙最強」甄子丹、郭富城昨晚出席星皓電影《西遊記之大鬧天宮》慈善首映禮，同場還有羅仲謙、汪圓圓及新人夏梓桐等，氣氛熱鬧。
發哥偕發嫂進場時，隨即成為焦點所在，發哥即展示其親民作風，不停展露笑臉及向兩旁影迷揮手，場面墟冚。當司儀在台上訪問一眾主角，發哥與子丹一碰面即妙語連珠「過招」，先是扮演玉帝的發哥笑言拍攝武打過程時相當辛苦，身兼動作指導的子丹即接口：「發哥又詐我型喇！」
目標破9億票房
司儀再問子丹有否向發哥「偷桃」時，發哥半開玩笑謂：「我係玉帝，佢點敢？我唔拍佢咪好慘！」事後子丹謙稱自己做「後輩」，惟發哥即搞笑稱有子丹「睇住」，他說：「我哋拍打戲佢一定親自監場，驚我哋有乜損傷保險賠唔起，佢係老闆嘛。甄生，食粥食飯靠晒你喇。」而發哥亦有為子丹被盛傳脾氣差而解畫：「畀你黐到成身毛，你都會發忟啦。」
當發哥在台下接受記者訪問時，問到子丹有否投訴他打戲動作未達標？發哥謂：「佢唔會喺我面前講，背後都唔敢，我係玉帝，上有如來佛祖，在公在私佢都唔敢郁我，想死咩！」對於老闆王海峰聲稱該片票房要達9億才封蝕本門，發哥說：「希望唔止咁少啦。（開續集？）如果唔使打我可以收平啲。」談到今年賀歲片「自己打自己」，發哥再幽默說：「『宇宙最強』先係男一號，嗰邊（《賭城風雲》）就有霆鋒同阿澤，我五五波啦，加埋先一套。」
最重視觀眾反應
而子丹與城城齊齊接受訪問，前者表示觀眾反應比票房更重要，又形容今次製作是「三年磨一劍」。原先嫌拍續集辛苦的子丹昨晚即改稱：「never say never，我唔會斷自己後路嘅。」城城則希望觀眾粉絲能看出他們的心血及誠意，多打分數。
文：影視組