黃芷晴否認母血癌：冇咁嚴重
黃日華老婆梁潔華被指身患重病更要接受化療，女兒黃芷晴昨日就澄清媽咪不是患癌且情況OK，不過護母心切的她對問題大多三緘其口，但就承認母親正在住院，而且自己亦為此事哭過。另張兆輝表示黃日華上星期如常與他練波，未覺對方有異樣。
藝人黃芷晴和姜麗文昨日出席商場新春活動，對於有報道指黃芷晴媽咪梁潔華身患重病，免疫力完全喪失並已於11月底入院接受化療，病徵疑似是血癌，芷晴澄清母親不是患血癌並強調情況OK︰「冇咁嚴重，亦唔使化療，不過媽咪已經唔係圈內人，想低調啲，多謝大家關心。」
她透露母親12月中才入院，問父母的銀婚紀念日是不是在醫院度過？她說：「正日係12月7號，一家人喺屋企簡單食飯過。（媽咪一直冇出過院？）我諗大家會明白。（醫生講幾時可以出院？）唔好意思，暫時唔講住，想聽從媽咪意思低調啲。」她又承認有為此事而喊過︰「都有嘅，始終家人唔舒服都會關心。（爸爸講起都眼濕濕？）唔會。（但成日愁眉不展？）咁啱影到啫，你知佢成日都係咁。」她又否認母親一直發燒不退：「都無發燒。（係咪暴瘦?）冇瘦到，食到嘢嘅。」
有指因醫療費昂貴而令黃日華要狂接工作撲水，芷晴笑說：「唔好咁講，其實之前啲工作一早已經簽晒約，都唔係特登為咗呢件事而撲水。」
現身浸會醫院
而昨晚黃日華偕女兒黃芷晴一同到浸會醫院探望母親，父女昨晚由醫院正門離開，兩人均戴着口罩，各自拿着一袋物品離開，全程由黃日華回答記者問題，問到太太情況，他邊行邊說：「OK，進展唔錯，（太太幾時出院？）應該過年前，（日日嚟探太太？）會會會，應該嘅。」他並兩度向在場記者表示「辛苦晒」，然後駕車載同女兒離開，而黃芷晴亦在旁表示「辛苦啦！」
而黃日華對此事低調到連其好友三哥苗僑偉、三嫂戚美珍以及波友張兆輝都不知情，張兆輝接受電話訪問時表示剛從內地拍劇回港不久，故沒有聽聞華嫂患病。
文︰影視組