Chilam被批添丁：承你貴言

Chilam、麥玲玲師傅和藝人何傲芝昨日出席香港賽馬會假跑馬地馬場舉行的「農曆新年賽馬日記者會」，Chilam以一身白馬王子look亮相，玲玲師傅即場為Chilam批馬年運程，表示他會大紅大紫，添丁和買樓都會集中在馬年和羊年發生，Chilam聞言後笑言：「如果生十兄弟點算？」對此，玲玲師傅說：「生多個仔先生女。」Chilam即刻笑晒：「承你貴言！」

賺錢落晒靚靚袋

事後，Chilam被問到係咪真的會生女？他笑說：「冇方程式話一定生女，仔女都係天意，比任何計劃都來得重要。我哋係一對合法夫妻，有仔女好自然！（努力緊？）希望順其自然。」另外，玲玲師傅還透露Chilam馬年會行名氣運，而Chilam老婆袁詠儀（靚靚）則會行大財運：「所以Chilam賺到嘅錢全部落晒靚靚袋中。」

娛樂圈易招口舌

對於娛樂圈馬年運程如何？玲玲師傅預測：「馬年娛樂圈麻麻哋，講嘢要小心啲，容易招口舌，電影就唔錯，票房會復甦，樂壇會辛苦啲。（黃秋生因選演藝人協會會長惹起紛爭係咪應驗咗？）開始應驗，呢個只係頭盤，往後仲多啲。」

她還說藝人馬年要北上掘金會好艱難：「內地好多都寧願選擇價錢比較低的藝人，當初同章子怡去南京做動土，啲大星一郁就要二百萬。（踢爆章子怡身價？）之前寫過啦，我聽客戶講啫。」

文：名人組