祖兒微波爐叮熱戀情
樂壇第三張成績表《十大中文金曲頒獎禮》前晚在九展圓滿結束，天后容祖兒和陳奕迅（Eason）繼續成男、女歌手大贏家。早前抱病開足十五場騷的祖兒，前晚連續獻唱多首得獎歌，表現回勇。
剛在上海錄影完春節晚會活動回港出席《十大中文金曲頒獎禮》的祖兒，以超性感大Deep V現身，成全場焦點，她自言﹕「身體好番六成，人都開心番好多。」對於性感亮相，祖兒表示：「無辦法啦，要靚！帶個『微波爐』畀大家睇吓。」祖兒又感謝狄波拉（拉姑）特地下廚，為她炮製慶功宴卻令自己都生病，笑言紅館有隻「JY616」病菌。問可有傳染給男友劉浩龍？她說：「佢頂得住！佢有日都唔舒服，但食咗維他命C就OK，好強壯。」
早前祖兒公開大讚男友是太陽，記者打趣問到夜晚師兄變做甚麼？祖兒笑說﹕「係太陽能！」又指自己從不介意公開談男友：「咁大個人有分寸。」早前曾透露有意在36歲前結婚生仔，祖兒前晚改口：「40歲生都唔遲，生一定通知大家。」同時否認公司對此有微言：「未有咁諗，咁大決定要同公司商量。」
Eason 肥又唔夠氣
而攬六獎成男歌手大贏家的Eason前晚心情大靚，屬四大唱片公司歌手的他被記者指今次是他13年最後一個頒獎禮：「冇所謂啦！今日冇發台瘟，原來自己適合唱分半鐘，或者兩、三個鐘，唔可以一首歌唱太耐，呢個係今年得着。」隨即自嘲：「我又唔夠氣、又肥、又唔Fit、又唔掂，自己鬧咗自己先，等人鬧起上嚟會輕手啲。」Eason強調不會因上次在叱咤表現失準，遭批評而生氣，坦言的確準備不夠。
小鳳姐：睇騷請排隊
在台上跟頒獎嘉賓徐小鳳「雞啄唔斷」的Eason，讚小鳳姐唱腔獨特兼字正腔圓：「所以問佢幾時開騷。」而以開胸長裙現身的小鳳姐，被記者讚她性感露事業線，她即笑說：「你哋曳啦。」同時又歡迎Eason到來欣賞其下月演唱會：「好歡迎佢嚟，但都要排隊。自己太耐冇開騷，好多歌手話想嚟。」
文：音樂組