JM旅行避年唔敢搞霆鋒
早前與謝霆鋒傳緋聞的女星文詠珊（Janice Man，JM），昨日以紅色大露背裙出席護膚品活動，她稱風水師指紅色旺她，問她是否也旺姻緣？她笑言：「希望乜都旺，事業愛情都旺。」她坦言希望2014年可脫離單身行列，但不敢多想，因冇得強求。
至於新年會否到霆鋒家拜年？JM說：「朋友囉！唔會去佢屋企拜年。（新年同佢有聚會？）我唔喺香港。（新年前去佢屋企食團年飯，霆鋒廚藝好叻。）我唔打搞佢。（怕惹緋聞？）都有少少驚，唔想有炒作新聞，只係想做好分內事。」她透露計劃新年期間與朋友到北海道滑雪，問有否緋聞男友份？她否認：「係同化妝師、髮型師朋友，仲有幾對情侶。」