許亦妮戲院偷拍 知衰求諒
許亦妮往戲院欣賞自己有份參演的電影，竟「膽生毛」盜錄相關影片，且上載到互聯網公諸同好，引來不少網民激烈討論。當許亦妮得悉闖禍，且分分鐘涉及民事訴訟，即刪除照片，並知衰闖禍自認「細路女唔識世界求原諒，而「宿敵」夏尉喻則明寸她明知故犯！
向來是非多多的前港姐許亦妮，繼被指溝仔王外，執二攤接演《喜愛夜蒲3》時又傳她擺老闆娘款遭同戲演員圍插，言猶在耳，前晚又踩屎，許亦妮入戲院捧自己場時得意忘形，犯禁盜攝。當她在大銀幕上看見自己的演出時，忘形地以手機拍下相關照片，並上載到微博與粉絲分享，且留言道：「竟然和雨僑同場，散場了才知道……好！今晚再去看，爭取同場機會！」
涉侵犯版權「闖禍」
或許許亦妮以為此舉無傷大雅，不過有粉絲發現疑涉侵犯版權，紛紛留言提醒，同時亦有人狂插。業界一直提醒市民尊重知識產權，許亦妮「一時興起」實在難辭其咎，當她驚覺闖禍，隨即刪除照片，惟已遭截圖留下「證據」，正所謂有圖有真相，今次她水洗都唔清！昨晚她接受記者電話訪問時「耍晒冧」說：「我知自己唔啱，但當時真係唔知，可能見到自己出鏡太興奮先咁做啫。我唔係有心盜錄，一知道就即刻刪除，我細路女唔識世界，以後一定唔會咁做，大家原諒我啦。」
早前與她傳不和的「寸嘴Barbie」夏尉喻回應記者查詢時，語帶雙關道：「咁搞笑？開場前都有片段叫人唔好盜錄啦，可能佢無心之失啫，話晒第一次擔正做主角嘛，佢太過欣賞自己嘅演出畫面，咪當幫部戲宣傳囉。」另一女主角雨僑卻力撐許亦妮：「咁唔小心？我下次會提醒佢。其實之前我哋去謝票，我曾經都有衝動影相留念，好彩最終冇咁做咋！」同樣有份演出的何佩瑜（Jeana）則說：「可能佢首次拍戲，緊張自己演出啫。如果下次我同佢一齊睇，會先沒收佢部電話囉。」
「影呢啲，自踩陷阱」
許亦妮深得導演錢國偉「歡心」，錢導力撐她說：「佢影嗰啲相，原本係想傳畀我，話自己睇咗三﹑四次，好支持套戲。佢細路女，今次係無心之失。真正盜錄涉及利益，佢咁樣做都冇利益關係，希望大家高抬貴手，手下留情啦。」不過，有指《喜》片台前幕後也有討論此事，認為許亦妮此舉「設陷阱畀自己踩，好傻」。
文：影視組