麥雅緻佗B狂掃嬰兒用品

近期有兩劇《貓屎媽媽》、《舌劍上的公堂》出街的無綫藝人張頴康與老婆麥雅緻日前拍拖到九龍灣某商場shopping，兩口子只鍾情BB用品舖頭，康仔看到嬰兒車、BB床等，不惜親身踎低左試右試，「有喜」雅緻則不斷追問售貨員使用須知，這對新手爸媽對張家新成員充滿期待。

康仔不但不時拖實老婆，處處照顧周到，他更勁讚老婆偉大，他說：「太太有咗，令我感受到女性佗B嘅辛苦，體力上、精神上都好大壓力，我會陪佢多啲。（點獎勵太太？）我係12月26日生日，以前一定會買份大禮畀自己，但自從老婆有BB，我哋買親嘢都係畀BB，BB已經係我哋嘅最好禮物。（想生仔定女？）我同太太都鍾意女，怕生仔會似我細個咁百厭，所以想要B女！」康仔謂明年6月會盡量調配工作，陪雅緻迎接小生命來臨。

預產期六月

雅緻對首次做媽媽充滿期待，她說：「我喺美國住嘅爹哋、媽咪知道我有咗，話要即刻返香港陪我，但我依家有咗四個月，預產期係出年6月呀，我叫佢哋唔使咁心急。（想生仔定女？）依家未知BB性別，未改名，我都心急想知，可以準備，我第一次做媽媽好多嘢都唔識，專誠請教陳倩揚同朱凱婷佗B嘅經驗。」

文：影視組