「苟龍」遭喝停禁合照
自從蒙面歌手龍小菌除罩展「龍顏」後，被發現跟苟芸慧（苟姑娘）如「孖生姊妹」，令人期待小菌與苟姑娘合照「相認」，難得昨日兩人首次同場，以為最令人期待的「苟龍」合照畫面將出現，誰料中途殺出程咬金，令「兩姊妹」嘆句「這麼近那麼遠」！
有「翻版苟芸慧」之稱的龍小菌同「真身版」苟芸慧昨日一同出席慈善聚餐，二人首次碰頭，小菌大讚苟姑娘靚女，又大方表示不介意與苟姑娘合照。
經理人阻撓
當記者邀請苟姑娘埋位時，她竟「點錯相」並語出驚人問：「係咪唔可以同亞視（人）合照？」當得悉小菌是歌手身份後，苟姑娘雖然一面茫然，仍樂意上前與「孖生姊妹」相認。
惟此舉似乎觸動了無綫的神經，其經理人見狀即刻放下手上碗筷，飯也不吃「九秒九」衝前攔截苟姑娘，並大喝一聲說：「大家食嘢先啦！」之後又有無綫的工作人員出手「護駕」，護送苟姑娘返回位坐，令一早在旁企企定準備影合照的小菌相當無奈，惟有傻笑打圓場，場面尷尬！
尊重佢意願
小菌雖然慘食檸檬兼被誤會是「亞視人」，仍識做地說：「我都係第一次遇到呢啲情況，唔係好識去處理，你哋體諒吓我，不過我尊重佢公司同佢個人嘅意願。」提到苟姑娘早前因甲狀腺偏低搞到水腫暴肥，體重曾高達250磅的小菌可會傳授減肥心得？她說：「唔使啦，其實大家唔好只係集中喺藝人嘅身形，最緊要健康同心情好，身形真係唔係最重要。」
同場的HotCha二缺一現身，Crystal和Winkie笑言為應付早起，食完飯即刻瞓覺！Winkie下午單飛出席另一活動，已習慣獨自工作的她，承認最不慣是Regen離隊之時，加上私人問題，有段時間自暴自棄，狂食暴肥。
文：音樂組