田蕊妮葉家寶握手扮friend
田蕊妮早前暗嘲亞視「冇人睇」，惹來亞視高層葉家寶斥責「飲水唔思源」，昨日二人「冤家路窄」同場，起初一個扮聾、一個被阻而未能合照，但食飯時兩人又相逢，葉家寶主動扮friend跟阿田搭膊握手，但阿田又暗寸亞視冇進步，更戲言：「咁我返亞視做好冇？」
榮升視后的田蕊妮人氣急升，工作不斷，前晚她以歌手身份為《慈善星輝仁濟夜》獻唱，昨日又踩兩場出席活動。上月她於無綫台慶頒獎禮致詞稱「由冇人睇嘅電視台開始做」，惹亞視高級副總裁葉家寶不滿，怒斥她「飲水唔思源」。
「返亞視好冇？」
兩人昨晨同場參加百萬行時被記者要求合照，惜葉家寶尷尬扮聾不為所動，阿田則被無綫職員阻止。問阿田有否尷尬？她謂：「冇尷尬，我唔介意（合照）。（公司唔畀影？）頭先感覺有啲似同前男友拍拖好耐，分咗手喺街見到唔知講咩好，惟有我有我生活，佢有佢忙碌。」並笑言跟亞視和平「分手」。
對於被轟飲水唔思源，阿田打趣道：「咁我返亞視做好冇？抓撈囉咩事啫！」更暗寸「前度」冇進步：「大家距離好似愈嚟愈遠，男友冇喺人生一路進步，但見到分手女友一路進步，驚人哋唔知我哋拍過拖，周圍同人講係佢前女友。（咁講唔驚被人話？）我係個比較真嘅人，唔識講假話。」提到日前亞視稱無懼新對手，可覺亞視有競爭力？她沉思十秒後稱有競爭才有進步。記者指亞視年中開劇，她笑謂：「我依家打算抓撈，諗住好似龍小菌咁笠面具去做。」
午飯時，葉家寶主動扮friend與阿田握手、搭膊合照，更叫她加油努力，不過阿田回敬對方：「你話我唔飲水思源喎！」葉家寶則稱做人不應忘本：「始終係你成長嘅一個經歷、過程，唔可以突然抹黑嗰段歷史。」對於阿田指亞視冇進步，他說：「亞視呢幾年係飛躍咁進步，由以往側重娛樂方面，依家提升到畀觀眾多啲資訊，絕對冇停留喺某個階段。」他又稱公司關心每個離巢藝人，也望同事們謹記當年由亞視培育出來。提到阿田戲言返亞視抓撈，葉家寶指亞視門常開，歡迎任何藝人加入。
有價值才被利用
阿田之後趕往大埔出席活動，再次回應「飲水唔思源」：「今日我有利用價值，好開心被佢哋拎嚟講，大家都冇怨恨，識咗家寶好耐，作為舊同事希望佢哋好。」
文：影視組