Bosco傷鼻浸海水 閉氣捱凍
無綫小生黃宗澤（Bosco）上月底在家中不慎撞到廁所門，鼻骨撞腫兼即時「爆缸」，有傳他要縫上5針，令拍攝中的劇集《點金勝手》一度暫停。不過，Bosco只休息幾日後便復工，日前與女主角徐子珊到小欖海灘趕拍新劇。
子珊肉緊搵交嗌
當日天氣相當寒冷，但Bosco只穿單薄恤衫上陣，扮演病人的子珊則頭戴冷帽及穿格仔恤衫。在劇中飾演情侶的兩人，當日並非拍攝親熱戲，反而要肉緊鬧交，見子珊嗌至聲嘶力竭，Bosco則表現較為冷靜，其後子珊突然拿刀刺向Bosco，受傷的Bosco不支倒臥沙灘，頭部浸在海水中，子珊以為Bosco已死，便跪在他旁邊喪喊！難為傷口未愈的Bosco表現專業，為配合拍攝多個角度，多次閉氣浸在水中，全身盡濕，非常慘情。
Bosco受訪時，被問負傷捱冷開工是否很辛苦？他直言：「都幾凍，衣衫又單薄，最慘係個頭要浸水，咁啱有浪捲上嚟，搞到啲水入晒個鼻度。（傷口浸晒海水，唔怕發炎？）其實都好得七七八八，男仔有疤都唔怕啦！化妝又可以遮到。」
文：影視組