祖兒爆佗B頌母愛 師兄高角度睇騷
樂壇天后容祖兒的《ageas富通保險1314容祖兒演唱會》合共十五場的跨年演出，前晚終在紅館順利完成首場表演，全場座無虛席之餘，又獲老闆楊受成夫婦、謝霆鋒和好姊妹蔡卓妍等捧場。祖兒於騷上貫徹其搞笑本色扮大肚婆，笑爆全場。
祖兒為個唱早在多月前已開始地獄式健身兼節食，於前晚穿上性感歌衫See Through黑色旗袍和桃紅色Deep V晚裝演出大騷修身成果，玲瓏曲線盡覽無遺。到快歌環節祖兒更將性感程度升級，以肉色Bra Top胸前掛起銀色大星星，再配襯貼身皮褲閃爆上陣，驟眼看似半裸表演的祖兒跟一眾來自美國和本地，穿上透視露股裝的舞蹈員勁歌熱舞，成功High爆全場。
阿姐睇足全場
至表演中段，祖兒又炮製另類驚喜，向觀眾表示：「有個秘密要同大家分享，我忍咗好耐，多謝所有團員包容，其實我有咗三個月！」台下嘩聲四起，她隨即以大肚裝步出現身，笑說：「我都有自己好想做嘅嘢，努力工作多年，我好想成為一個偉大嘅喜劇演員。」成功搞Gag的她其後解釋此舉是想親身感受大肚來歌頌母愛的偉大，然後就獻唱一系列歌頌母親歌曲。
祖兒於完騷接受訪問時，表示只有親身示範才知道母親偉大，故在演出中有此角色扮演，問到何時想真正懷胎十月做母親？她笑說：「過晒15場演唱會先講啦！」至於未見男友劉浩龍捧場？祖兒稱：「佢有嚟，不過坐喺最高，話要響唔同角度欣賞。」談到日前有傳她們兩人因為錢銀問題冷戰，對此祖兒沒好氣地表示：「開騷總有呢啲新聞，我哋冇任何錢銀瓜葛，只係好單純一場戀愛。」
而秘密捧女友場的劉浩龍穿上印有「JY」logo的演唱會外套，意圖粉碎情變傳聞，更在微博上大讚祖兒的演出Very Good，祖兒好友阿Sa及黃偉文亦大讚演出精彩，至於睇足全場的阿姐汪明荃更以「正！型！」形容祖兒的表現。
文：音樂組