田蕊妮談「套」大方 安全親熱
田蕊妮與杜汶澤結婚多年，生仔計劃一直只聞樓梯響。近日榮升雙料視后的她，被指為向公司報恩決定暫不生育，更逼老公戴安全套才肯親熱！阿田昨日直認親熱時有做足安全措施，並且未有生B計劃。
出爐雙料視后田蕊妮、黃翠如、王君馨、鄭俊弘等昨日到旺角鬧市宣傳新劇《舌劍上的公堂》，期間眾人大唱聖誕歌，又派宣傳海報，引來市民爭相搶奪，場面墟冚。一臉倦容的阿田透露前日獲老公杜汶澤送驚喜，邀多位好友到新居舉行入伙派對兼慶祝奪視后。
打茄輪當鼓勵
阿田笑指榮升視后後，老公比她還要高興：「佢尋日（前日）做廚師，又要招呼朋友真係好辛苦，結果切完蛋糕就醉。今日（昨日）屋企做冬，佢一早煲湯，同準備十幾人分量飯餸。（你幫手？）都想，但佢話會整錯程序唔畀幫。（旁邊打氣？）係啦，同佢打個茄輪當鼓勵。」
有傳阿田獲獎後為向無綫報恩，決定暫不生仔，即使親熱亦要求阿澤戴安全套。她聞言笑謂：「唔係嘛？咁報恩唔止係公司，觀眾都有投票。同老公都有諗過生仔問題，但呢幾年係唔會要住，新屋都冇BB房，咁安全措施梗係要做足！如果唔生小朋友，就算拍拖情侶，就嚟聖誕都唔好咁衝動，一個生命產生係要承擔，所以提醒大家唔好喺聖誕節亂嚟，喺條濕滑道路上做錯啲唔應該做嘅事。」
翠如撐洪永城
另外，翠如對於拍檔洪永城於頒獎禮台上的一番戲言，結果惹來抨擊，翠如對此謂：「佢一時開心啫，唔好話佢，佢都為呢件事苦惱咗一晚。佢本身係小朋友，係無聊啫，我會話佢喇！」
文：影視組