敏之重出江湖 唱旺盛Lady

陳敏之於《My盛Lady》中演的「袁萱」甚討好，劇中純情又帶點傻氣的她搖身一變成為靚女歌手，更與黃子華、徐子珊搞出三角戀，此劇明日大結局，屆時才知袁萱情歸何處。

錄音感動到喊

敏之亦為《My》劇唱了兩首插曲，包括《想一天》，該曲的網上點擊率甚勁，有很多粉絲留言叫敏之重出江湖做歌手，據知敏之亦因此劇得到不少登台及廣告等搵銀工作。

對於因拍《My》劇而有意外收穫，敏之日前受訪時坦言感意外：「冇諗過有咁大回響，唱歌一路都係我興趣同心願，自己好畀心機唱。收到好多留言，好感動，個個都叫我唱番歌。」問最初錄插曲時有否感壓力？敏之說：「自從06年錄咗《女兒紅》隻碟一首歌之後，就冇入過錄音室，所以錄音時都好緊張。我帶晒熱水、頸巾入去，錄音時都有喊，因為隻歌太感動。」問敏之有否想過再做歌手？她謂：「我係想唱歌，但將來有機會唱到劇集主題曲已好開心。」

盼大結局高收

敏之亦因為袁萱一角獲得不少搵銀機會，她坦言之後接的聖誕及倒數活動，都會演唱《My》劇的歌：「黃子華憑我哋套劇攞咗視帝，許紹雄又攞咗男配角，希望佢哋嘅幸運會帶畀我哋大結局有好成績。」

文：影視組