JC警鐘胸硬食頭槌

JC首次演出的舞台劇於今日正式公演，身為女主角的她與男主角趙勁皓（King）等一眾演員昨日進行最後綵排。飾演夏娃的JC與飾演阿當的King造型大膽，挑戰舞台劇尺度。她說：「做足晒安全措施，我覺得啲衫好靚，性感得嚟又高貴。」兩人的舞蹈不乏身體接觸，其中有一幕是King抱起JC，男方頭部剛好貼在JC胸前位置。

想男友呷醋

問JC可會感到尷尬？她說：「唔會，我信任佢，佢好專業。（有冇覺得緊張？）有少少，但係興奮嘅感覺多啲。（男友有冇呷醋？）我有send相畀佢睇，我希望佢會呷醋，因為咁即係代表佢在意，不過佢冇表現出呷醋，只係好支持我。」

King零反應

King被問可有掂到JC身體的重要部位？他說：「唔多，少少，最大程度都係我個頭掂到佢個胸。（驚唔驚有生理反應？）唔驚，唔會，我好專心演出。（感覺佢個胸真定假？）真心唔知，冇去感受。（有冇問佢？）呢啲咁敏感嘅問題唔會問。」再問他女友盧頌之可有看過他綵排？King說：「有，佢呢幾日都有入台睇。（佢睇到眼火爆？）唔會，佢畀咗好多意見我。（有冇呷醋？）佢冇呷醋，OKo架，不過亦有可能佢呷醋，所以日日嚟監場。」

文：名人組