田蕊妮樂極忘形爆露點疑雲
出爐雙料「視后」田蕊妮竟因當晚與周麗淇的一張合照而爆出「露點疑雲」，惟阿田極力否認並表示已做足安全措施，但這些小插曲都掩蓋不了她榮升視后的喜悅，昨晚就大晒老公杜汶澤為她親自下廚的「慶功晚餐」，認真羨煞旁人。
剛榮升「雙料視后」的田蕊妮日前在台慶頒獎禮穿了一件性感開胸low cut晚裝，全晚high爆的她不時與其他TVB姐仔玩自拍，表現勁風騷。不過在自拍期間，楊怡及徐子珊等突然為阿田整理晚裝，而鍾嘉欣亦以身遮擋，懷疑她們是留意到阿田走光。其後阿田與坐在身旁的周麗淇（Niki）等的合照就被Niki放上微博，有眼利網民即看出阿田疑似「露點」，其後Niki亦迅速剷走照片。
腦裏一片空白
阿田接受電話訪問時極力否認「露點」:「冇冇冇！唔係走光，着晚裝實會打底，可能佢哋見到我甩咗少少雙面膠紙，所以大家先你幫吓我、我幫吓你整番。」問到是否有貼乳貼時，她沒正面回答：「我安全措施做得好足夠，所以一定冇（露點）。」談到有網民表示因她在台上攞獎時忘了周麗淇的名字，Niki才會上載此相，阿田對此說：「呢個真係唔好意思呀，嗰吓我個腦一片空白，喺個台度又激動得滯，不過我唔信（Niki）係因為咁嘅原因，因為大家嗰晚都玩好開心。」她又表示Niki事後都有對她說不好意思：「唔緊要啦，一幅微博相啫，冇所謂。」
晒老公下廚照
周麗淇昨日亦否認阿田露點：「當晚只係同幾個女仔開心影相，唔知點解有咁嘅誤會，佢有做足安全措施，為免一路畀人誤會，搞到愈嚟愈大，所以我先Delete張相，我同阿田都覺得係誤會。」另外，阿田昨晚在微博大晒恩愛並上載一張老公杜汶澤為她下廚的照片，並寫着：「謝謝小杜大廚為我準備的二人慶祝晚餐！」
文：影視組