裕美喊住行禮設防3年

現年25歲的和田裕美（原名）同老公林恩浩昨午在西貢三育中學舉行婚禮，獲大批親友現身祝賀，好友高皓正就擔任婚禮司儀，禮堂兩側擺放了多幅二人的結婚照，場中又有個「J愛H」（Jason、Hiromi）的大型氣球。

身穿雪白色婚紗的裕美力谷事業線，又應記者要求同老公咀嘴數遍，裕美又話：「今次婚禮有好多贊助，身上嘅首飾過八百萬o架，之前又贊助我四圍影相，真係慳唔少！」

阿叻嘲笑嫁得出

裕美又興奮大爆原先無暇觀禮的前經理人陳百祥都有親身向她送上祝福，她說：「朝早喺新蒲崗接新娘嘅時候佢嚟咗，佢仲話『你終於嫁得出』，又畀咗封大利是！」問到新郎哥玩接新娘時可順利？他笑言：「都係做吓啲瑜伽動作，食吓芥辣朱古力。（畀咗幾多開門利是？）滿意數字！」

婚禮進行期間，裕美跟隨一眾花仔花女入場，接受眾人的祝福，在唱聖詩的時候，事前揚言未識喊的裕美終於忍唔住感動喊爆，從旁的老公就緊緊捉實裕美隻手，場面溫馨感人。

裕美又話明年三月會同老公去澳洲，至於幾時生B？裕美就話暫時想享受吓二人世界，計劃三年先「造人」，她又笑言：「我哋喺澳洲會小心啲，就算真係有咗都會好愛錫佢！」

文：音樂組