梁朝偉Sharp醒民族

民族風(Ethnic chic)似乎從未離開過時裝潮流的巨輪,這股風潮在今個秋冬繼續盛行。

民族風的服飾多以圖案為主,包括圖騰、刺繡、幾何圖案以及腰果花等,色彩繽紛卻又偏向以大地色系為基調。但Ethnic chic並不容易Carry,配搭出錯便會娘味十足。而圈中一眾型男索女也都熱捧這股民族風,名模陳嘉容就大讚影帝梁朝偉Sharp醒有新鮮感,樂壇天后容祖兒則襯得夠靚,有修飾線條之效!

梁朝偉

「幾得意,同佢一向嘅打扮好唔同,好少會見到佢着有民族元素嘅服飾,有新鮮感,成身都襯得好靚,睇得到有花心思Mix & match,襯對紅色Loafers好Sharp醒。」

黃宗澤

「OK,Casual得嚟幾特別,緊身上衣配低襠褲感覺好Balance,Show到佢嘅身形比例。」

蔡卓妍

「好靚,係佢夠瘦先Carry到呢條褲,上身大Pattern襯下身細Pattern好match,又唔會花得滯,Cutting簡單利落,襯對藍色高踭鞋,撞色撞得好好睇,髮型化妝亦恰到好處。」

容祖兒

「好有民族氣息,淨色Top襯印花長裙好Match,望落唔會眼花繚亂,反而令身段更修長,髮型都Set得好靚,好襯。」

Janice Man

「條裙對佢嚟講成熟得滯,着到有啲阿太Feel,再加埋個髮型就更加老氣,浪費咗佢嘅青春本錢。換對短Boots會型格啲,時尚啲。」

Angelababy

「條裙唔啱佢嘅年紀着,老積咗少少,換對銀色或者白色嘅Ankle boots會青春啲同有型啲。」

陳慧琳

「條裙嘅Pattern好平均,比例好靚,佢都着得好靚,簡單嘅髮型化妝已經好夠,感覺清新舒服。」

Profile

香港著名模特兒陳嘉容(Eunis),曾為各大國際品牌行時裝騷,在時裝界打滾多年,在時裝的理論還是實戰都難不倒她,近年更為電視時裝節目擔任主持,化身stylist教人配襯衣着打扮。