祖兒個唱症候群甩底叱咤

吳雨霏（Kary）、薛凱琪、官恩娜、張敬軒、新組合Fabel等歌手昨日出席叱咤頒獎禮記招，為配合主題，各人以最有紀念的造型亮相。雖然眾女各出奇謀騷性感搶鏡，但多位「叱咤友」祖兒、Eason、Twins、千嬅及何韻詩統統缺席，場面失色。

以個唱索爆造型亮相的Kary被取笑因失戀而剪短髮，她尷尬說：「唔關事。（同余文樂分手後激瘦？）呢排做多咗運動。」對於有指她與薛凱琪力爭「女歌手」銅獎，她說：「講真今年真係冇乜信心，全年時間擺咗去做碟。」

姜麗文低胸搶「峰」頭。

張敬軒率領同門出席叱咤記招。

軒仔打定輸數

打定輸數的軒仔承認今年樂壇很悶：「上一批去咗走埠，我喺呢班新人面前係小小前輩，雖然今年冇獎攞，不過會着靚啲出席。」同場的梁漢文則被取笑「老餅」，他無奈說：「仲有Joey Tang（鄧建明）。」

官恩娜露小蠻腰搶鏡。	吳雨霏否認為情消瘦。	Fabel很榮幸可參與叱咤。

對於一線歌手缺席，大會發言人說：「Eason喺泰國開騷，Twins一早通知唔喺香港，祖兒原先答應嚟，唔知點解唔嚟，要問唱片公司。（G.E.M.呢？）佢冇上榜歌，所以冇邀請。」對於記者會不及往年熱鬧，他說：「今日出席嘅歌手係出色嘅歌手。」千嬅因出席《第四屆紐約電影節之中國之夜》而甩底，何韻詩亦已向公司請假到加拿大「叉電」。

必出席頒獎禮

祖兒經理人霍汶希表示：「原本係答應出席，因為祖兒壓力太大，搞到有『演唱會症候群』，我哋尊重佢決定，開騷前盡量唔畀佢出席任何公開活動，除非一早接咗，避免順得哥情失嫂意。」並強調祖兒必會出席頒獎禮。G.E.M.經理人則暗寸電台：「我哋派咗三首歌，其中《你把我灌醉》上過其他流行榜冠軍。（因為同電台鬧翻而冇得上榜？）相信有少少關係。」

文：音樂組