蔡加讚先探軍情 搶新娘
即將「拉埋天窗」的蔡加讚前晚在音樂會上自爆已準備了「十兄弟」應付姊妹團，他亦有刺探軍情，務求順利「搶得美人歸」，至於羅敏莊就同老公陳國邦孖實合唱，認真sweet爆！
玩具大王蔡志明之子蔡加讚前晚與父母及未婚妻汪圓圓欣賞《喜運佳‧譽一鐘錶呈獻：保良星光獻愛心RoadShow LIVE羅敏莊音樂會》，羅敏莊（Mimi）的老公陳國邦和囡囡陳禛都有撐場。
唔搞單身派對
就快做「老襯」的加讚坦言心情興奮又緊張，自己最近正努力操fit，是否「搶新娘」時騷肌？加讚笑言：「斷估唔會要我除剩底褲啩，剝衫嘅嘢等啲兄弟應付。」他又透露正向圓圓表妹湛琪清埋手探軍情，望姊妹團「輕手啲」，不過就未諗準備幾多開門利是。問加讚會否搞單身派對？他尷尬擰頭話：「冇呢個需要，啲兄弟自己玩好喇，唔好畀我知。」訪問完後，加讚就傍住圓圓匆匆入場。
當晚主角Mimi換上多套性感晚裝獻唱情歌，她又即場大爆老公陳國邦是第三個情人，亦笑言自己因「唔小心」而增添家庭成員，臨尾老公更攬實Mimi一同溫馨合唱。
羅敏莊驚落淚
受訪時，Mimi話囡囡是第一次看她的音樂會，平時她練歌囡囡會興奮拍掌，坦言勁驚獻唱時會忍唔住喊。最近Mimi努力keep fit，記者笑言她大可「生多件」才減磅，她說未有計劃：「老公有要求過，但湊一個已經好辛苦，如果生仔嘅話希望似我啦，因為囡囡已經似爸爸喇。」
另外，蔡加讚日前在歐米茄「A Tale of Perfection」慈善晚宴中，以六十萬投得韓星池珍熙親筆簽名證書的歐米茄博物館腕錶，並將款項撥捐和平發展基金會，以推動香港青少年的科學與科技發展。當晚出席嘉賓還有謝婷婷、Mandy Lieu等人，星光熠熠。
文：音樂組