劉青雲知衰 唔再打女人
劉青雲「虐打」葉璇！女方更在大庭廣眾展示傷勢，搞得青雲羞愧非常，立誓以後不再打女人。同場的黃曉明自爆於抑鬱症邊緣「踩鋼線」，懷疑自己的生存價值，要經理人急急趕來安撫照顧，未知可有嚇壞Angelababy？
劉青雲、黃曉明、方中信、葉璇、薛凱琪（Fiona）、鮑起靜、衛詩雅、冼色麗、孫佳君等昨午出席爾冬陞監製新片《暴瘋語》煞科記招，Fiona罕有性感大騷小蠻腰，但始終不及右臂傷痕纍纍的葉璇搶鏡。戲中患精神病的青雲經常虐打「太太」葉璇，最後更從15樓將老婆掟落街，其中一場重頭虐打戲，縱使靚女事前做足預防措施，最終仍意外受傷。
青雲接受訪問時尷尬謂：「現實生活中我唔打女人，但拍戲第一次踢女人就係葉璇，今次又要虐打佢、撞佢埋啲嘢度，我立誓以後唔再拍呢類戲，因為好唔舒服。講起呢場戲好心緒不寧，其實埋位時我都成日摸佢墊嘅pad，希望對準啲位，唔好整親佢，但都搞成咁。」身為「外母」的鮑起靜則代女兒狂摑青雲，問到是否「14巴港母」時，鮑姐笑說：「咁又冇，不過唔想NG，惟有真係打落去。」
曉明疑患抑鬱症
「海綿蛋糕」黃曉明與偶像青雲大演對手戲，自言心情緊張，拍攝期間他更一度懷疑自己患上抑鬱症：「當時很不開心，覺得自己日拍夜拍沒有休息，質疑為何要生存在世界上，於是打電話給經理人發脾氣，嚇得他趕來片場看我，但他們覺得這樣子很好，起碼入戲嘛。（嚇親Baby？）我從不打罵女人。」
戲中與曉明扮演一對的Fiona則坦言：「見到曉明，好似一塊鏡咁，睇番以前自己患抑鬱症時嘅恐怖樣。我有寫日記，依家睇番都覺得自己當時好得人驚。（借畀曉明睇幫佢入戲？）好私隱喎，要識我10年以上先可以。」
文：影視組