陳展鵬蕭正楠 等機會輪住發威

筆錄：影視組

攝：林楠

蕭正楠承認以前年少氣盛，故重返無綫初期被人以為他很寸。

蕭正楠與陳展鵬際遇相似，於失意時想退出娛樂圈。

不知如何走下去

兩人背景相似，歌星夢擦身而過，曾經對前景充滿信心。可惜理想與現實是兩回事，陳展鵬遇上金融風暴令出碟夢撻Q，蕭正楠則不懂與人溝通而產生很多負面新聞。他們承認失意時沒有目標，感覺前路茫茫。

陳展鵬於《巨輪》和鍾嘉欣飾演情侶，蕭正楠則與田蕊妮。	放大圖片	二人事業起步，信心返晒嚟。

陳：自己18歲讀無綫訓練班，嗰陣好多幻想，夢想自己做歌星、拍電影。嗰陣去唱卡拉OK認識咗蘇德華，試音之後寶麗金簽咗我，但後來因為97金融風暴出唔到碟，公司仲被人收購埋。呢個歌星夢雖然短暫，但都係美好嘅。當時只係失望仲未識驚，諗住東家唔打咪打西家，唔知道呢場金融風暴會令到成個經濟靜咗落嚟，靜咗兩、三年就開始驚喇！最艱難嘅時間係加入亞視之前，當年廿一、二歲冇晒錢，要靠教人打乒乓波同做地盤搵食。嗰陣唔會覺得辛苦，反而係自己冇方向，唔知條路點行仲辛苦！冇嘢做咗兩、三年，同個娛樂圈開始失去聯絡。都有諗過離開呢行，到你冇錢食飯，現實同理想就係兩回事。好彩屋企人、朋友都好支持我繼續喺娛樂圈發展，後來加入咗亞視，一做就六年。

蕭：我就2002年入行做歌星，當時轉變都好大，入行後一上一落，發生咗好多事，好多新聞都唔係咁好。依家諗番轉頭覺得自己當時太新，唔識同人溝通。後來就去咗大陸發展，當時可以話係自己最失意嘅時間！爸爸又走咗，將香港成個基地搬咗去北京，之前北京都未去過，有啲離鄉別井感覺。嗰陣大陸邊有依家咁好景，自己收入亦大不如前，做咗好多同唱歌冇關嘅事，嗰陣普通話又唔好，上到台都係被人笑。當時賺錢唔多要勒住使，前景連一啲光都見唔到。最唔開心嘅係冇咗目標，工作都係零碎，覺得之前喺香港建立嘅慢慢流走，喺度浪費緊時間。

返無綫盡地一煲

渾渾噩噩了數年，陳展鵬與蕭正楠機緣巧合下重返無綫拍劇，更給自己最後機會，不成功便轉行。

蕭：喺大陸過咗幾年，歌星合約滿咗之後都猶豫咗好耐，有諗過唔做呢行，轉喺北京做啲小生意。好彩當時阿媽想我返香港陪佢，轉捩點係2008年，以前做唱片認識何麗全，佢就幫我問公司，後來見咗樂小姐，決定去無綫重新開始。自己鍾意唱歌從來冇諗過拍劇，入行拍《戀愛自由式》以為係自己最後一部劇，返嚟無綫就拋低咗個包袱，重新嚟過。初時返嚟機會唔多，頭兩、三年都冇乜人知我返咗嚟，但係喺TVB就最踏實，只要你肯做就一定會有人知。由《宮心計》、《法證先鋒Ⅲ》、《仁心解碼Ⅱ》到近期嘅《巨輪》逐步逐步嚟。

陳：我都係2008年決定由亞視返無綫，當時係有啲嘢唔能夠妥協，好似我做演員點解無端端要轉我做職員呢？自己有個底線，當然唔可以要求間公司配合你，自己就選擇咗唔玩呢個遊戲。其實我離開寶麗金時TVB有向我招手，但當時自己覺得未學到啲乜唔想返嚟住。2008年返嚟TVB係自己一個非常大嘅轉捩點，嗰時自己諗呢次係畀自己喺娛樂圈最後一個機會，唔得就轉行。

蕭：我都係咁諗，話畀自己聽最後o架喇。你有畀自己一個時間？

陳：我就先畀兩年時間自己，睇吓自己可以去到邊度，如果唔得就唔好搞喇。返到嚟都要承受好大壓力，雖然一直係一個演員，但無論你出席咩活動，啲人當你隱形，令到你好冇信心，有啲宣傳直情避咗唔敢去。

蕭：我都有同感，自己做歌手嗰陣，覺得啲記者好似唔鍾意我，自己不如行埋一邊企，去記者會嚟咗等於冇嚟咁，自己都有啲抗拒，好似做每一樣嘢都冇意義。

默默耕耘終上位

兩人從配角做起，憑努力加運氣下終於升呢擔正演出，總算對自己及支持者有所交代。

陳：返嚟TVB雖然係由頭嚟過，第一套劇《桌球天王》只係得三場戲，後來《烈火雄心3》、《真相》到依家嘅《巨輪》都係一步一步咁行。好好彩彩返到嚟好順利，自己當係bonus。

蕭：我自己就好想畀大家知道我係咩人，以前好多誤解，再解釋都解唔到。今次返嚟係要重新開始，啲人話頭幾個禮拜以為我好寸唔敢同我講嘢，呢六年嚟喺TVB上咗好多課好踏實，做幾多就有幾多，覺得自己似番個人。

後記：有事業有信心

陳展鵬在亞視工作時，筆者曾訪問過他一兩次，正如他自己所說當時信心不足，說話一句起兩句止；蕭正楠加入無綫初期，偶然在電視城碰到記者亦顯得戰戰兢兢。兩人因事業失意失去信心，但事過境遷，事業亦為兩人重拾尊嚴，重新上路。