莊思敏撐男友 前後下露
拿督女莊思敏前晚以「前後下開」出席電影首映禮，開中門、大露背、騷長腿的她大派眼睛冰淇淋，而連詩雅則麥當娜上身，可惜心口連幾両肉都冇，被公司勒令要增肥。
莊思敏前晚與緋聞男友導演葉念琛亮相新片《溝女不離3兄弟》首映，為配合大會dress code，莊思敏以開中門、大露背及騷長腿示人，成功搶盡風頭，她不諱言算是入行以來最性感的一次。她透露第一眼見到好友為自己準備的這身戰衣亦大感意外，但有做足預防措施。問她胞妹莊思明與陳司翰復合一事，她先追問記者妹妹的答法，得悉對方「不欲回應」時，她即笑說：「咁我都唔答喇，其實最緊要佢開心，都冇得唔畀佢拍拖，勸又勸唔到咁多，祝福佢囉。」話中有話顯而易見。
重演十四巴港女
日前莊思敏聯同陳奐仁到土瓜灣重演「十四巴港女」一幕，並將短片上載到互聯網，前日單日已錄得逾4萬點擊率，大收宣傳之效。問到莊思敏過往可有當街打人？她坦承：「以前試過畀個追求者煩住，覺得唔摑佢唔醒。」重演個案念頭源自葉念琛，他昨接受電話訪問表示：「如果外界反應再好啲，我會拍續集添，不過題材唔好講住。（怕被人話抽水？）我改編咗，對白唔同晒，連『麥噹噹』紙袋都冇放低喎。」
連詩雅心口冇肉
前晚首映禮還有連詩雅、沈震軒、陳奐仁、吳若希等出席，連詩雅以爆炸頭及濃裝出場，直言造型倣效巨星麥當娜，她又自嘲冇本錢性感：「公司話瘦到心口冇幾両肉，着衫想托（胸）都托唔到，下令我增肥。」而「寸嘴Barbie」夏尉喻再次露出被懷疑隆胸遺留下來的疤痕，她否認博宣傳：「呢個係我嘅過去（指自己受傷），唔需要刻意隱藏。」
文：影視組