Lam撩青霞開片 難敵睡魔
歌手林子祥（阿Lam）前晚擔任晚宴表演嘉賓，獲林青霞現身撐場，二人一見面即「雞啄唔斷」，阿Lam大爆二人有意合作拍戲，但奈何不敵「睡魔」搞到遙遙無期；同場的鄺美雲（Cally）就同男友拖實進場，男友仲大讚Cally唱歌「100分有凸」，認真sweet爆！
歌手林子祥、大美人林青霞、鄺美雲與男友林達民、港姐陳庭欣與莊思明、粵劇名伶白雪仙、黃玉郎，以及楊天經夫婦等前晚出席中大五十周年紀念「殿堂演藝之夜」晚宴，表演嘉賓阿Lam在席上一見青霞，即刻走埋去「撩吹水」，兩人當年曾合作電影《我愛夜來香》，青霞話：「本來唔嚟o架，知你唱歌先嚟撐場。」獲笠高帽的阿Lam好客氣話：「唔係嘅，好多朋友都有嚟唱。」問到阿Lam可想同青霞再度合作？阿Lam即刻話：「想，我哋兩個都想，但我哋要瞓覺，拍戲冇得瞓喎。」
不認同樂壇患癌論
阿Lam又話有睇無綫節目《星夢傳奇》支持老婆葉蒨文，亦大讚參賽者水準OK，提到周啟生的「樂壇患癌論」，阿Lam當堂「打咗個突」表示不認同，又話：「講啲咁嘅嘢？我冇聽過喎！（佢鬧陳奕迅有五宗罪！）呢啲佢嘅事，唔關我事。」阿Lam又語帶雙關話：「只要向前行，真心去做，唔係博懵就得。」
讚Cally100分有凸
同男友林達民十指緊扣到場的Cally，透露即將推出佛歌唱片，在旁的男友亦識做地說：「我會買，佢成日唱卡拉OK畀我聽，仲好聽過唱片，100分有凸！」氹到Cally一副冧樣。而身穿tube dress大騷事業線的陳庭欣同大露背的莊思明就襯到絕現身，問陳庭欣會否準備性感戰衣在台慶「鬥晒」？她說：「我已經好澎湃喇，好知足啦！」另外，天經就話專程來撐母親陳寶珠場，又大爆：「媽咪勁緊張，一早就嚟咗綵排。（你幾時生B？）有喜訊會公布，媽咪對仔定女都冇所謂。」
文：音樂組