汪圓圓樂做多仔婆

模特兒汪圓圓將於11月與拍拖兩年多的男友蔡加讚（Karson）拉埋天窗。尚有一個多月便會成為新娘，圓圓坦言非常緊張，要由一直被家人視為「掌上明珠」的女孩，變成一個「持家有道」的人妻。

今年只有27歲的圓圓，在香港來說絕對是早婚，她笑言全家上下均是早婚一族。「我爸爸、媽媽拍咗拖幾個月就結婚，家姐汪詩詩同姐夫甄子丹識咗兩個禮拜就訂婚。其實我當時未拍拖，唔明家姐點解咁crazy，因為結婚喺我心目中好神聖。」直至遇到Karson，圓圓才開始明白及相信緣分。「其實一開始我係同Karson有好感，不過冇諗到結婚咁遠，直至拍咗拖一年幾，就開始有可以同呢個人走落去嘅感覺。可以想像到同佢一齊到老、一齊生小朋友。如果對方係你嘅Mr. Right，你遇到佢之後，真係會感受得到你哋兩個將來會走嘅路！」

汪圓圓與蔡加讚有情人終成眷屬，婚期定於11月。

圓圓的父母、家姐與姐夫一家四口，還有表妹湛琪清，均對Karson讚不絕口。

學習夫妻相處之道

但先別說將來的路怎麼走，現在僅僅籌備婚禮，兩口子亦不時會因細微的事而發生小爭執。「佢喺香港長大，我喺多倫多，我哋對於婚禮嘅諗法唔同。喺外國，婚禮一定會有個dance floor，不過依家我哋要擺百幾圍，真係好難，有啲嘢要妥協。」圓圓亦坦言自己從家姐及姐夫身上，也學習到不少夫妻的相處之道。「佢哋結婚嘅時候我17歲，我一直都喺佢哋身邊睇住佢哋兩夫婦，有時會嗌交，但係又會氹番對方，得閒又會畀對方驚喜。佢哋令我明白到一段關係係要雙方都用心經營嘅。」

蔡志明夫婦與圓圓出席Karson鐘錶集團的活動，以作支持。	喜愛小朋友的圓圓，揚言希望多生小孩。	婚宴將播放圓圓及Karson到外地旅行的照片。

幫Karson宣傳腕錶

圓圓已決定婚後定必以家庭為先，但不會疊埋心水做「少奶奶」。問到Karson是否希望她退出幕前？圓圓甜絲絲地說：「其實Karson想畀到幸福我，但係都會支持我嘅決定。」但愛夫心切的她亦會自動波替Karson宣傳其腕錶集團。「我私底下成日同朋友推介，幫佢手宣傳。我啲朋友成日問我會唔會幫佢做代言人，不過其實我哋都未諗過，因為我哋平日唔會討論工作嘅嘢。」

由於是家中的孻女，所以圓圓從小都習慣被人照顧，但現在將要打理自己的家庭，她笑言婚後首要的任務就是要學會下廚。「我爸爸、媽媽、家姐煮嘢食都好叻，得我自己唔識，所以我覺得依家最重要係學煮嘢食。」但相信她的未來老爺、奶奶最在意的，絕非圓圓會否下廚，而是打算生多少個孫兒讓他們「弄孫為樂」吧！幸好，喜歡小孩的圓圓亦不介意做「多仔婆」，更揚言想生多幾個！「雖然我喺外國長大，不過思想都好傳統，一定要結咗婚先會生小朋友。但係其實我哋唔打算一結婚就即刻生BB，因為我哋都仲後生，唔急，想享受吓二人世界先。不過我自己好鍾意小朋友，所以都想生多幾個。」

Karson送40萬元名錶

將榮升為鐘錶集團老闆娘的圓圓，笑言自己最貴重的腕錶亦是由Karson於他們的紀念日所贈，價值40多萬元。她坦言不在乎它的價錢，而是其背後的意義。「不過其實我做模特兒，戴錶做嘢唔方便，所以都好少戴。如果放假嗰陣，我比較鍾意戴啲大隻啲、男仔款啲嘅錶，天梭表嘅款式好多時都好sporty得嚟又好靚，好易襯。」

大型婚禮 筵開150席

將於11月30日拉埋天窗的圓圓及Karson，鐵定於會展筵開150席。要籌備一個如此大型的婚禮，圓圓坦言絕不簡單，壓力更導致她失眠。「因為我哋兩個都要求高，想全部嘢都完美啲。婚禮主題都係以浪漫、溫馨為主。我哋都想大家了解多啲我哋嘅感情世界，所以到時會播啲我哋由細個、到相識、到拍拖，一齊去旅行嘅相等等。」圓圓更笑言自己跟Karson都十分眼淺，相信當晚他們都會「喊到變豬頭」。