Jocelyn伴闖頂峰 Rosemary圓夢重生
名模Jocelyn及Rosemary情同姊妹，二人不時相約做運動健身。Rosemary感激Jocelyn把她從人生低潮中拯救出來，並與她一起完成夢想，排除萬難，齊齊攀登世界七大頂峰之一的乞力馬扎羅山（Mount Kilimanjaro）。
J：Jocelyn、R：Rosemary
J：諗番轉頭，我哋係因為做模特兒先認識，可以話係一見如故、好投契，我哋嘅價值觀好相似，而且生活習慣都好相同，成日約埋一齊練跑，好自然就熟咗。
R：冇錯呀，我依家已經考咗國際健康教練證書（NASM），可以正式做你嘅私人教練教你健身，你就可以幫我做Energy Work，改善我嘅情緒同紓緩壓力，就當係互相交換啦！
J：我上次幫你做Energy Work嘅Millennium Method，可以幫你搵到精神上同肉體上嘅問題，之後消除佢。我之所以會學Millennium Method，係因為我媽媽喺2003年嘅時候病咗，試過睇好多中、西醫，但情況都冇好轉。其實有醫生建議佢食藥治療，但隻藥會引起副作用，令人情緒抑鬱，甚至有自殺機會，所以全家人都好反對。我做資料搜集，發現一個人嘅健康，係受飲食習慣、精神狀態、思考方式嘅影響，於是我用咗兩年時間完成一個語言程式學（NLP）嘅課程，我發現運用呢啲自然嘅方法，真係可以令到我媽媽嘅病情減輕同冇再惡化。
愛情感情不如意
R：其實幾年前，經歷咗我人生最黑暗嘅時光，唔單止感情出現問題，同屋企人關係又唔好。當時你建議我上一個能夠紓緩情緒嘅課程，真係幫咗我好多，好多謝你！當時導師叫我諗，自己到底想做乜，我第一時間諗到就係同成班朋友一齊爬上山頂，一齊歡呼、拍手。最後，我真係成功做到呢件事，仲邀請你同你老公Anthony去。
J：哈哈，係呀。嗰次真係一次好好、好難忘嘅經驗！一行八人一齊爬位於非洲、世界七大頂峰之一嘅乞力馬扎羅山（Mount Kilimanjaro），一爬就爬咗八日！
R：嗰次旅程真係好辛苦，山上面嘅天氣真係好凍，溫度得攝氏零下16度，可以見到大家嘅眼睫毛上面，係結住冰粒，只要一出汗，啲汗就會即刻凍到結成冰。
J：雖然個過程好辛苦，不過我哋互相加深咗了解，而且仲有好多笑料。每朝當我哋仲喺個營裏面瞓緊覺嘅時候，都會聽到出面有歌聲，原來係你唱歌！你每朝早都拎個電飯煲，一邊唱歌一邊煮嘢食！哈哈！
惡劣天氣下走散
R：我最難忘係旅程嘅尾段，天氣突然變到好差，仲落起冰雹、行雷閃電，啲雨水係咁湧落嚟，簡直好似瀑布一樣，而且又好凍，真係好可怕。遇上咁惡劣嘅情況，大家都急住向前衝去下一個中轉站，混亂之下，我同你同Anthony都走散咗！當時仲有同另一個朋友，不過我哋發生咗爭執，我知道點去中轉站，但係佢唔信我，話要行另一邊，我情急之下同佢講：「你仲想要你條命嘅，就跟我行啦！你行嗰邊好危險！」不過最終佢都係堅持己見，同我分開行。不過好彩佢最終撞到你同Anthony。
J：哈哈，每當我遇到任何唔順心嘅事，都會諗番起當日喺山上嘅苦況，就會即刻覺得眼前嘅所有嘢都唔係問題，我一定能夠克服到。仲記得我哋登上頂峰嗰陣有幾興奮，而且仲開咗支威士忌嚟慶祝！
計劃再攀山籌款
R：嚟緊11月我打算再去尼泊爾攀山籌款，好想去你哋喺嗰度興建嘅學校進行探訪！其實我一直以嚟都有支持間學校，真係好期待見吓啲小朋友。
J：所以嗰間學校嘅小朋友全部都係你嘅仔女，真係好多謝你咁支持我哋！可惜11月我同Anthony有工作，未必可以抽到時間去，真係好可惜。依家我同Anthony都好努力工作，希望可以儲多啲錢，快啲生小朋友，好想自己嘅公公、婆婆，可以同陪住我嘅小朋友成長，因為佢哋已經90歲，如果我真係生咗小朋友，就會返家鄉夏威夷長住，得閒就返香港工作，探吓朋友。不過我唔會畀太大壓力自己，好多時你愈係希望做到某啲嘢，反而愈難成功，所以要時刻保持平常心，唔想自己有咁大壓力。
R：我好同意你嘅講法。就好似我成日都畀人追問幾時同男朋友Jason結婚，其實呢啲真係急唔嚟，亦唔會畀限期自己，不過呢一刻我哋暫時都未會結婚住，最重要我哋相處得好開心，結婚呢啲，要一步一步嚟。
筆錄：龔凱欣
口述：Jocelyn、Rosemary