阿倫恨見囝囝拖洋妞
譚詠麟（阿倫）昨日以高爾夫球手造型出席活動，對於契仔關楚耀（Kelvin）與周秀娜傳緋聞，阿倫說：「佢話係朋友約埋跑步。（對女方印象？）大方同醒目，見佢答記者尖銳問題都幾得體，EQ同IQ都高。」阿倫又說Kelvin沒帶周秀娜見他，問是否最想見親生仔譚曉風的女友？阿倫笑咪咪說：「有排先見，帶鬼妹好過帶鬼仔呀。（擔心囝囝性取向？）唔會，有我嘅遺傳，唔使擔心。（唔驚父債子還？）吖！你哋係傳統中國人。」
毛巾醫頸椎
阿倫又透露已多年沒打高爾夫球：「因為頸椎移位，依家踢波連頂頭槌都唔敢，做過好多物理治療、拔罐同推拿，但都唔及一條毛巾，之前毛巾當枕頭反而整番好咗。」記者笑指男人最緊要腰骨，經常講有味笑話的阿倫即哈哈大笑說：「咁咪少啲高難度囉。（平時做開高難度動作？）唔知你噏乜。」
另外，Kelvin昨日和師妹AGA到屯門V city出席活動，Kelvin被問到擇偶條件是否要身材好？他尷尬說：「有梗係好，（鍾意跑步？）呢個梗要嘅！」對於契爺向他八卦緋聞，Kelvin說：「尋（前）晚有講吓，佢捉我埋一邊笑吓我，（帶女方見契爺？）OK，好呀。」至於周秀娜演出的無綫節目《度身訂造旅行團》日前講述歌手吳業坤向她求婚，結果令娜姐粉絲醋意大發，並在網上鬧爆坤哥，娜姐前晚出席活動時說：「我都驚，因為坤哥都多fans。」
文：音樂組