茵媺大肚返港 恩愛拍寫真

TVB小生陳豪及花旦陳茵媺（Aimee）六月在巴黎成婚，七月在加拿大擺喜酒，之後陳豪返港工作，Aimee留在多倫多養胎。至昨晨約五時十五分，大住個肚的Aimee終於返港，吸引半百傳媒到機場等候，穿上深藍色連身裙、架起墨鏡的Aimee親自推行李與父親步出，全程笑晒又揮手，見她明顯肚凸凸但手腳仍算纖瘦，還戴起陳豪所送的巨型鑽戒、手鏈及耳環，一身貴婦look。

情不自禁摸肚子

陳豪及經理人到場接機，陳豪甫見到略帶疲憊的Aimee，即忍不住輕撫她的肚子以解相思之苦，雙陳應要求企定合照，途人亦紛紛拿出手機拍照並大呼恭喜，瞬間將機場大堂變成舞台一樣。粉絲送上禮物後要求合照，兩人都無任歡迎，表現勁nice，尤其見到BB時更是「準爸媽」上身，笑逐顏開逗玩BB。

茵媺返港養胎，吸引半百傳媒採訪。

陳豪接得老婆後，即表現恩愛地摸吓她的大肚。

其後雙陳接受訪問，準老竇陳豪不時笑到臉都紅晒，Aimee表示心情愉快，自入行以來未試過於多倫多家中逗留這麼久，問到可有掛住老公？她即甜笑說：「當然有，呢個唔使講！」Aimee承認懷孕初期經常嘔吐大作，頭幾個月都要攬住廁所，其後變得舒服些，母親亦為她準備健康有機食物。問到坐長途機可有不適？她說：「OK，空中小姐好照顧我。（增磅幾多？）睇咗好多書，唔可以重太多，重量會影響BB同媽媽健康。」

茵媺親自推行李出閘，父親緊隨其後。	茵媺見一媽咪粉絲孭着小朋友，即母愛大發逗小朋友。	陳豪接得老婆，便返回大埔比華利山新居休息。

避答懷孕五個月

至於BB性別？Aimee大賣關子說：「未睇醫生。（你哋都知o架！）都係遲啲先啦！（決定香港生？）遲啲先肯定到。（選擇開刀定順產？）睇咗醫生先。（ＢＢ幾多個月大？）遲啲先啦！（係咪傳聞中五個月？）唔答喇。」問到是否2013年內生BB？她突然大惑不解，要陳豪解釋後才恍然大悟，但仍是三緘其口。再問是否已決定BB英文名？她表示男女都有心水，但都是英文名，而且很有意義。

提到陳豪曾笑言考慮跟她拍大肚裸照，Aimee即望實陳豪，嚇得陳豪急急說：「唔係我講！你（記者）唔好亂嚟呀！」Aimee笑說：「我都覺得唔似佢講，個問題咁曳！（咁會唔會影？）未知，maybe，或者可以，可以留個紀念，不過第一步都係睇醫生先。（陳豪操刀影相？）I don't know！」問到會否叫陳豪陪入產房？Aimee表示一定要，但笑問陳豪會否剪臍帶時，他笑笑口說：「睇醫生畀唔畀。（你怕血？）我都做過好多次醫生啦！」

一直在Aimee身旁的陳父顯得頗為怕醜，他亦表示未知外孫是男是女，但笑言「男女都想」。其後眾人慢行到停車場上車，最後駛返陳豪斥資三千萬為愛妻準備的新居——大埔比華利山寓所休息，之後夫婦倆一直未有外出。

文：影視組