劉錫賢閃婚 秋生傳生仔秘笈
昨日51歲的藝人劉錫賢迎娶年齡相差14年的圈外女友陳麗娜，昨午一對新人先在灣仔舉行結婚酒會，晚上就在太古一酒家大擺23圍宴請親朋戚友，出席的圈內人包括黃秋生、鄭則士、陳煒、鍾景輝、袁潔儀、鮑起靜和力谷5吋巨乳的黃夏蕙等。劉錫賢笑言接新娘時帶備「鐵筆、鐵錘、鐵鏈」：「姊妹團唔開門，我哋就撞門，最多賠番條鏈畀酒店！」之前劉錫賢曾表示劉爸爸上年患重病兼得了輕微腦退化症，他坦言結婚是為沖喜：「我爸爸病重，朦朧之間都只記得我未過門嘅太太。」
有外父相
他表示太太是上年認識，今年年頭就求婚：「因為年頭我爸爸住醫院，團年飯都要喺醫院食，我買咗鑽戒，問准父母可否求婚，我老竇聽到即刻笑晒，老婆亦即場答應。」全程小鳥依人的新娘子指婚後想生一個B，劉錫賢則覺得隨緣：「有咪嚟囉。（對老婆有咩承諾？）最緊要我錫佢，唔好蝦佢，因為佢好薄皮，好易喊。」
與劉錫賢同是演藝學院同學的黃秋生表示做了人情當賀禮：「佢已經得到全世界最好嘅嘢，唔使送嘢啦。（教佢夫妻相處之道？）我當年就話少不更事先要教啫，佢搵咁耐先搵到，唔使教啦。」問到有兩個兒子的秋生會否傳授「生仔秘笈」？他尷尬：「勤力啲就得啦！（但點生仔？）佢少做運動，多食肉都應該生仔，不過佢有啲外父相，所以今次都好難估。」
文：影視組